Vancung Pennak ah ahodah a ngan bik?

Photo Credit

Ngakchia hna i muisam le a upa cang mi hna muisam zoh ṭi in na tahchunh, na ngia bal hna maw? Ngakchia hna muihmai nih dah daihnak le lawmhnak an ngeihter deuh upa cang mi hna muisam nih dah? Mi tam deuh nih cun ngakchia hna muisam nih kan lung a kan lawmhter deuh kan ti cio men lai.

Nihin kan relmi cathiang (Matt 18:1-5, 10, 12-14) chungah zultu hna nih an kar lak ah aho dah a ngan deuh timi bia an i alnak kong a si. Kan nih hna nih hin teh, aho dah a reng a sang deuh, aho dah thil a ti kho deuh i hmaizah pek deuh ding a si tiin pakhat le pakhat kar lakah cuai kan i thlai bal ve cio hna maw? Midang hna nih upat mi le thangṭhat mi si ding cu minung sining in duh cio mi a si ko.  Lianhngannak kong he pehtlai in Psalm caṭialtu pa nih hin tin a ti: “Nangmah lawnglawng hi a cungah a ummi na si i sunparnak le upatnak cu a lu ah na chiah,” (Ps 8:5) tiah a ti. Chim duhmi cu, Pathian dah ti lo cun minung hi a lianngan bik mi a si tinak a si.

Sihmanhsehlaw nihin kan relmi thawngṭhabia chungah Jesuh nih ngakchia pakhat kha a auh i zultu hna hmaiah a dirter i, “Nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo. Vancung Pennak chung i a ngan bik cu mi toiah aa dor i ngakchia bantuk ah aa cangmi cu a si,” tiah a ti hna. 

Ngakachia nih hin zeithil dah a tuah khawh hnga i zeitin dah a ngan bik khawh hnga tiin ruahnak zong ngeih khawh a si. A tawinak le a fiannak in chim ah cun ngakchia hna nih cun chimhmi bia an ngaih caah a si. Tuah ding le hrial ding hna kha chimh ning bangin an tuah i an zulh. Ahohmanh nih “mah ngakchia te hi kan saya a si, a kan hruaitu a si, a kan vengtu a si” an ti bal lo. Anmah hna tu kha zohkhenh le kilkawi a herh mi an si. Sihmanhsehlaw ngakchia hna nih nu le pa, zohkhenhtu hna chimhrinmi le cawnpiakmi kha zulh dingin an i ready kho zungzal timi hi theih ding a si. Jesuh zong nih cu bantuk sining cu a kan duh piak mi a si ve. Ngakchia hna bantukin a cawnpiaknak ngaih ding le zulh dingin ready in um zungzal dingin a kan duh piak. Ngakchia hna nih an ngeih mi lungput na ngei kho ve cang maw?  

Nihin thawngṭhabia chungah tuu tlau kong cawnpiaknak zong kan hmuh rih. Jesuh nih, “Tuu 100 a ngeimipa nih , a tuu pakhat cu a tlau ahcun, zeidah a tuah hnga, tiah nan ruah? Tlang cungah a tlongmi 99 cu a kaltuak hna lai I a tlaumi cu a kawl lai. A hmuh tikah 99 a tlau bal lomi cung nak khan hi tuu pakhat cungah hin aa lawmh deuh,” tiah a ti. 

A tlaumi tuu hmuh ṭhan a si tikah lawmhnak a um bantukin tu chan zongah Pathian cawnpiaknak zulh duh loin a tlau sualmi, a pial sualmi hna a kawltu ding minung tampi a herh. A tlau mi hna hmuh tiangin a kawl kho tu hruaitu ṭha tampi kan ngeih khawh hna nak hnga Pa Pathian sinah fakpi in thlacam zungzal hna u sih. 

 

Add new comment

1 + 0 =