Vancung Pennak caah Theitlai Tha

“Nannih nih cun nan ka thim lo, keimah nih kan thim hna i a hmun ding thei kha tampi in va tlai tuah u tiah kan fial hna. Cucaah ka min in nan halmi paoh cu ka Pa nih an pek hna lai” (John 15:16).

Judas Iscariot nih kan Bawipa a rawi hnu ah zultu (12) hna nih Judas can ah minung pakhat thim ding in an i timh tikah an chimmi cu: “Amah cu Bawipa Jesuh nih kanmah he khual a tlawn lengmang lio i kan sin i aa tel lengmang vemi, Johan nih tipil innak kong a chim ri in Jesuh nih van ah a kan kaitak tiang kan sinah aa tel lengmang vemi a si awk a si” tiah an ti(Acts 1:22). Cun thla an cam i, “Bawipa nangmah nih minung lungthin vialte cu na hngalh dih. Hi pahnih hna lakah hin aho deuh hi dah na thimmi a si, kan hmuhsak tuah” tiah an ti. Camcawhfung an zuh i an thimmi cu Matthias kha a si; cun amah cu lamkaltu pahleikhat hna bu chungah khan a lut(Acts 1:25-26).

Mithiang Matthias kong lam hi tampi cu theih a si lo. Sihmanhsehlaw, zultu (12) hna chungah thim a si tikah amah cu bishop pakhat a rak si ve ti cu a fiang mi a si. Bupi tuanbia ah langhter a si mi ah, Matthias cu a tu Ethiopia, Turkey or Geogia hrawngah hin thawngtha a rak phuang mi a si i Pathian a zumhnak le aa bochannak ruangah thah a rak tong mi a rak si. A thih ning cu lung in cheh a si lo ah a lu tan a rak si ruangah nihin ni ah amah cu martyr tiin cawnlawmhnak bupi nih a pek nak hi a si.

Thawngtha bia kan theih mi chung kan zoh than tikah Bawipa nih a kan fial mi cu: “a hmun ding thei kha tampi in va tlai tuah tiah kan fial hna. Cucaah ka min in nan halmi paoh cu ka Pa nih an pek hna lai. Cucaah nawl kan pekmi hna cu hihi a si: pakhat le pakhat i daw u” tiah a ti (John 15:16-17).

Bawipa nih Matthias kha a thim i a hmun ding mi thei va tlai ding ah fial a si bantukin kan nih hna zong Pathian nih a kan thim ve cang hna i rian a kan fial ve cang. Muihnak chung i a rak um mi kan mah hna zong kan i tlak lo buin Bawipa nih a kan thim ve i siangpahrang hna le a van mithiang hna he um ti ding caah kawhnak kan hmuh ve cang bangin (Pls 113:7-8)cu kawhnak chungah cun luh dingin aa tlak mi kan si khawh nak hnga ding caah “theitlai tha tlai khawh” i zuam zungzal hna u sih.