Vancung Pennak co kan duh a si ahcun Pathian fialmi rian ṭuan ding a si.

“Hihi minung caah cun a si kho lo, sihmanhsehlaw Pathain caah cun zeizong vialte hi a si kho ko.”(Matt 19:26)

Nihin kan rel mi thawngṭhabia thiang (Matt 19:23-30) hi nizaan kan relmi cathiang chungin mirum tlangvalpa kong a peh a si.

Nihin kan relmi thangṭhabia zong hi kan theih leng mang mi thawngṭhabia a si ko. Jesuh nih “Kalauk ca i ṭhim kaa chung luh kha mirum mi ca i Pathian Pennak chung luh nakin a fawi deuh,” tiah a ti nak kong a si. Bible lei thiamsang tampi nih hi bianabia he pehtlai in phun tampi in an langhter cio ko hna. Sihmanhsehlaw an fianter cio mi ah an i lawh cio nak cu, “Kalauk ṭhim kaa chungah luh khawh ding cu a si kho lomi le a fawi lomi a si” tinak ah khan a si. Cu ruangah mi tampi nih vancung Pennak chung luh khawh ding cu a har tuk hringhran mi a si tiah an ruah cio nak hi a si.

Minung hna caah zeitluk hmanh in a si kho lo dingmi thil si ko hmanhsehlaw Pathian caah cun zeizong vialte hi a si kho mi an si ko. Jesuh Khrih nih Pathian bawmhnak kan herh nak kha a langhter duh mi a si. Zeibantuk thil kan tuah paoh ah siseh Pathian aa tel zungzal ding a si. Pathian aa tello a si ahcun kan tuahser mi thil vialte hna cu pakpalawng menmen an si ko lai. Pathian dawtnak le zangfahnak thawngin vancung Pennak chungah luh khawhnak nawl pek kan si cang ko. Sihmahsehlaw toidornak lungthin ngeih ding timi hi a biapi tuk mi a hung si ṭhan.

Biatak tein Jesuh hnu zulh timi hi a har ngaimi rian a si. Mah lei kap in i sum ding le thlah ding hna hi tampi zong an um fawn. Zeicah tiah cun mah duh paoh in nun a si ti lo caah a si. Kanmah le kanmah kan i uk ter ti lo caah a si. Cuasicaah Jesuh nih a hnu zulh a duh mi paoh cu a vailamtah kha aa put lai i a ka zulh lai tiah a rak tinak kha a si. 

Pathian duhnak zulh duh ṭung lo le tuah ṭung loin Vancung Pennak co ding i timh cu Jesuh nih mirum tlangvalpa a ti bang khan: “Kalauk ca i ṭhim kaa chung luh kha mirum mi ca i Pathian Pennak chung luh nakin a fawi deuh” tiah a ti bang khan a si ko lai.