Vutcaam

Minung kan nunnak ah hin kan theih hrimhrim ding a simi cu “Kei hi zeizong vialte a tuah khotu ka si lo” timi hi a si. Lent caan, ulhnak caan kan hun phanh tikah Bupi nih vutcaam puai ni in a kan thawkpiak i a sullam cu kan taksa thlarau thazaang dernak kha a bik in a langhter duh mi a si. Vutcaam puai ni ah Siangbawi te nih thluachuah pek cia mi vutcaam khan kan lu cungah hmelchunhnak an tuah i : “Nang cu leidip in a ra mi na si i leidip ah na kir than lai timi kha i thei” or “Na sualnak kha kaltak hna law Thawngtha kha zum tuah” timi bia he kan lu cungah tazik a kan tuah piak.

Vutcaam hmelchunhnak nih hin minung kan nun caan a tawi le kan thazaang a der ning kha a langhter.

Hi vawlei cungah minung tampi kha upadi a phunphun chuah in rumra ngei ngai in a uktu hna tampi an um ko men lai. A um zong an um len ko hna. Cubantuk thiamthiam in mah le fimthiamnak hmang in thil khuaruahhar a phunphun a sersiam kho tu hna zong an um len ve ko lai. Cun chawva lei in a ngeimi hna nih an ngeih mi rumnak theih dih khawh lo tiangin a rummi zong an um ko lai.

Sihmanhsehlaw hi mi vialte hna zong hi nikhat an thi cio te ko hna lai. An nun lio ah an sinum a niambik sining dirhmun in rian a tuan tu hna an thih ning sining kel bang khan an thi ve te ko hna lai. Mi tlamtling lo, mi santlai lo, midang sin thil hal-ei in a vakvai mi hna an thih tikah an ton te hnga ding mi sining bangin an thi ve te ko hna lai. Thih hnu caan tlawmpal a hun raoh tikah an thlaan kha zoh than a si ah cun an rawhral ning kha aa lo cio ko hna lai. An thawnnak, an rumnak, an fimnak nih a zei ti hmanh in an thih hnu ah cun a bawm kho ti bal hna lai lo. Kum 100 a tling cang mi tarnu tarpa hna kha “Na nun chungah zei thil ti khawhnak dah na ngeih? Na nun chungah hin teh i lung si cikcek in ka nung kho cang tiah naa ruat maw?” tiin biahal nak tuah hna u sih law an leh cio hnga ding mi cu “ka caan a tawi tuk, zei ka si lo” timi lehnak bia hi an chim cio mi a si ko lai.

Bupi nih kan lu cungah vutcaam phulhnak puai (sual ngaihchihnak) a kan tuahpiak mi zong hi “ruahchannak thar he nun than khawh ding caah sawmnak zong a si”. Sualnak lam kha kal tak in a thianghlimmi nun zia dawh he nun than nak ding caah a kan sawmmi a si.

Minung cu Pathian nih amah muisam he a rak kan sermi kan si ko nain a kan sertu kan Bawipa le kan Pathian a simi nih a kan chimh mi bia le a nawl zulh duh loin a niambikmi sining, a donghnak tiang sining vutcaam bantuk sining, thihnak ah aa thlami kan si. Sualnak chungah a tu le a tu a thla mi zong kan si.

Thlaici cu vutcaam chungin rawl thazaang aa lak i a hung keuh than bangin a thianghlimmi Pathian fanu fapa si than nak hnga ding caah thlacamnak thlaici, sual ngaihchihnak thlaici, midang cungah dawtnak lungthin he bawmhnak peknak thlaici vorh than in nun than ding caah Bupi nih caan tha caan sunglawi a kan tuahpiak mi ni a si.

Mithiang Paul nih: “Cucaah Khrih lamkaltu bantukin kannih cu kan ra. Kannih nih kan in nawl hna hi Pathian nih an nawl hna bantuk a si: Pathain he i rem ko u, tiah Khrih min in kan in nawl hna”(2Cor 5:20).

“Pathian nih, Nanmah cu zaangfah kan duh hna caah kha caan ah khan nan bia cu ka rak in theihpiak hna i khamh kan duh hna caah kha ni ah khan ka rak in bawmh hna, tiah a rak chim. Ngaihmanh u! Pathian zaangfahnak hmuh caan cu atu hi a si i khamhnak hmuh ni cu nihin hi a si” tiah a ti (2Cor 6:2).