Zangfah a Thiammi Jesuh

Nihin ni caah Bupi nih a kan thimpiak mi Cathiang cu (Matthew 9:35;10:1,5a,6-8) a si. Kan Bawipa Jesuh Khrih cu khuapi siseh, khuate siseh a tlawng i an i pumhnak inn ah khan Vancung Pennak kong Thawngtha kha a chimh hna i a zaw a fakmi kip kha a damter hna timi kong a si.

Cun Jesuh nih a hnu zulh in a thawngtha bia phuan mi a ngaitu mi zapi kha a hmuh hna tikah “khaltu a ngei lomi tuu bantukin lungrethei le awlokchong in an um kha a hmuh hna caa a zaang a fak ngaingai” hna tiah a ti rih. Kan Bawipa Jesuh Khrih minung sinak in a rak chuah lio ah a rak hmu i a rak bia kho mi hna cu “tuukhal hna, arfi zohthiam mi hna le lungthin tha he a rak hngak mi hna”an si kha kan hmuh khawh.

An hmunhma le an himnak a kan rolh sual lai tiah a rak phang mi Herod siangpahrang siseh, Pharasees mi hna le phung bia cawnpiaktu saya hna nih Pathian Fapa a si nak le Khamhtu Messiah a si nak kha an rak hmu kho lo i thah ding le hrawh ding lawng in an rak i zuam zong kan hmuh. Dawtmi u le nau hna, hi vawlei kan nun chungah that nak a tuah tu hna le mi zapi nih thatnak le him nak an hmuh khawh nak hnga ding caah aa zum mi hna cungah nahcuahnak lungput a ngei mi hna nih an rawhral nak hnga ding caah khua an khan zungzal mi hi hmuh khawh cio mi a si.

Hihi satan riantuannak hna an si. Jesuh Khrih cu lungthin tha a ngei mi zungzal mi a si. Lungthin tha a ngai mi hna:“lungthin a thiangmi cu lunglawmmi nan va si dah! Pathain kha nan hmuh lai”(Matt 5:8) tiah a ti bangin lungthin a thiangmi hna le lungthin tha a ngei mi hna lawng nih kan Bawipa Jesuh Khrih kha a Pathian sinak he an rak hmuh khawh. Dawtmi u le nau hna, midang cungah lungthin tha le lungthin thiang a ngei mi kan si khawh zungzal nak hnga ding caah Pathian sinah thluachuah veel hal zungzal hna u sih.