Zarhkel (14)nak Zarhpi Ni

Voikhatnak Bible             - Zechariah 9 : 9-10

Salm                               -145:1-2,8-11,13-14 (leh 145:1)

Voihnihnak Bible             - Rom 8 :9,11-13

Thawngtha Bia                - Mt 11 :25-30

Zachariah nih cun Jew miphun hna nih Messiah an hngalh ning le an zumh ning an palhnak kha remh`han piak dingah fakpi in  a bawmh hna. Messiah cu zeizong vialte a tuah kho mi, tthawnnak, lianngannak, thil ti khawhnak vialte a ngeimi a si i minung vialte caah a si, Jew mi phun ca lawng a si lo, velngeihnak, dawtnak he mi vialte khamh awk ah  a ra lai ding mi  a si, ti hi  Jew miphun hna sinah fakpi in a chimh hna.

Amah kong hngalhnak a karh chinchinnak ding caah Pathian nih cun Profet tampi a thlah hna lengah a fapa ngeihchunte zong cu a thlah. Jesuh cu tlam a tlingmi hmanthlak, a nungmi a pa hmanthlak a si. Amah hi cu aho paoh nih i zohchunh ding le i cawn dingah kau cia mi cauk bantuk a si. Sermi thil vialte le leicung minung vialte cungah dawtnak tlamtling in a ngei mi a si.

Kan nun chung kan hngalh zungzal hnga ding mi cu, Jesuh le a pa hi fiang tein hngalh, zumh lawngah  zungzal nunnak cu kan co khawh lai. (khrihfa tam deuh nih cun Jesuh a hngal lo mi le a zum lo kan um lo, asi nain hngalh taktak le zumh taktak kha a biapi, parpavuan  in zumh le hngalh cu a fawi tuk hringhran i ttih zong a nung tuk fawn.)

Kan thinlung chungah kan i chiah zungzal hnga ding mi thil pahnih cu;  (1) Pathian cu minung hngalhnak thluak nih a phanh khawh lo mi a si i kan chungah Thiang Thlarau nih a kan bawmh lawngah cawn khawh hngalh khawh kan si lai. (2) Pathian hngalhnak a kan dawnkhantu cu, sual kuang chung ah aa khumh dihmi, ruamkaihnak, pawrhlawtnak, haak kauknak tbk...  hna hi an si i fakpi i zuam in kan tthenh dih hmasa a hau.

Jesuh nih a kan chimh mi cu, nunnem le toidawr tein a nungmi cu nunnak hmaan ah a nung mi an si, a ti. Hi thil pahnih i tleih in Jesuh kan kawl ahcun rang deuh, thuk deuh in kan hmuh ko lai.

Bawipa cu dawtnak a ngei mi le zaangfah thiam mi a si, a thinhun a har i a fekmi dawtnak in a khat mi a si. Aho cung paoh ah a ttha i a ser mi hna an dihlak  cungah zaangfahnak a ngei (Salm.145 : 8 – 9 ).