ZARHKEL (25) NAK ZARHPI NI

Voikhatnak Bible - Isaiah. 55:6-9

Salm - 145:2-3, 8-9,17-18 (leh.145:18)

Voihnihnak Bible - Philip.1:20-24,27.

Thawngttha Bia - Mt.20:1-16

PHUNGCHIM DING A MURU

1. Vancung pennak kong he pehtlai in, nihin dum ngei pa le rian ttuantu kong kan theih tikah ahohmanh kan lung a tling cio lai lo ti cu a fiang ko. Zingka te a ra mi zong fangkhat, chunhnu a ra mi zong fangkhat, zanleisang a ra mi zong fangkhat, aa zat cio in ttuan man a pek tik hna ah, minung hmuh ning cun attaza lo ngai. Asinain Jesuh hmuh ning ahcun a rak ding tuk.
2. Mah tuanbia nih hin minung kan lung put fiang tein a langhter. Nahchuah kan ngeihmi le hakkauhnak kan ngeihmi hi fiangtuk in a lang. Zanleisang ttin a zat i phaisa pek an si tikah, zingka te a ra mi pa nih zanlei sang a ra mi pa he ttuan man aa khat in a hmuh tik ahcun a lung a tling kho hrim lo. Tam deuh ka hmuh ding a si, caan sau deuh ka ttuan, a ti. Asinain zingka a ra mi pa nih a ruah khawh lo mi cu, lo ngei pa le zanleisang a ra mi pa an biakhiah mi kha a si.
3. Zeiruang ah minung nih hin hawi dang tthatnak an hmuh tikah kan lung a fah i kan nahchuah hna hnga? Nang le kei zong mah rian ttuannak kong he pehtlai in cun kan si ve ko hnga lo maw? Zinglei i a ttuan mi pa kha chunni tlak fangkhat hmuh ding ah a hna a tla cang ko na in tangka pek tik ahcun a lung a tling ti lo. Aruang cu zanleisang a ra mi pa he an ttuan man aa khah caah a si.
4. Jesuh nih a chim duh mi cu, lo ngeitu pa cu Pathian he a tahchunh duhnak a si. Lo ngei pa cu phaisa ngei a si i a duh paoh in a phaisa cu a pek khawh ko hna. Cubantuk te cun vancung ram a ngeitu cu Pathian a si i a duh paoh in amah duh mi kha a luh ter ko hna lai. A auh mi paoh nih an zulh ahcun, zinglei, zanlei chunhnu ti a um lo vancung ram an phan dih ko lai.
5. Pathian nih minung hi zeitluk in dah a kan dawt ti mi langhter ding caah Jesuh nih, hi lo ngei pa tuanbia hi a kan chimh mi a si. Lo ngeitu pa hi zaangfahnak a ngei taktak mi a si i ttuan awk ngei lo, ahohmanh nih an auh duh lo mi hna zong kha a auh hna i a lo chung ah a ttuan ter ko hna. A caan le ttuan mi kha biapi in a chia lem lo i phaisa an hmuhnak ding lawng kha khua a khan piak hna. Hi ve bantuk in minung vialte zong hi Pathian nih a kan dawt tuk ve caah a caan a um chung paoh a kan auh ve. Hmanung bik kha hmasa an si lai i hmasa kha hmanung an si te lai a ti.
6. Minung pakhat kan si ahcun kanmah nakin a sang deuh mi zong an um lai bantuk in a niam deuh mi zong an um ve ko lai. A herh bik mi cu, a sang deuh mi zong nahchuah lo, a niam deuh mi zong serhset lo, mah le sining tein um le ngeihmi cungah i lungsak kha kan Bawipa duh mi cu a si ko.