ZARHKEL (27) NAK ZARHPINI

Photo Credit

Voikhatnak Bible       - Is 5:1-7

Psalm                      - 80:9,12-16,19-20 (lehnak Is 5:7)

Voihnihnak Bible       -  Philippians 4:6-9

Thawngttha Bia         - Matt 21:33-43

  • Mitsur Dum tuah pa nih a dum cu vawlei tthatnak ah a tuah lengah ttha tein a zohkhenh ko nain mitsur cu a tlai tikah a thor mi lawng te a tlai caah dum ngei pa cu a thin a hun tuk i ka hrawh dih lai i ka khangh dih lai a ti. Kannih vialte zong hi Pathian nih vawlei tthatnak ah a kan cin mi kan si leng ah ttha tein a kan zohkhenh mi kan si ve. Thei kan tlai mi hi a thor mi kan tlai sual ahcun khangh kan si ve ko lai. dum ngeitu pa a thin a hun bantuk in Pathian thinhun tertu kan si ve sual ahcun nun man ngei lo kan si ko lai.
  • Nihin Salm hla chung kan hmuh bantuk in, Pathian sin kan nawl hnga ding cu, Nangmah cu zeitik hmanh ah kan in mertaak lai lo, nung dam in kan umter law kan in thangtthat lai, maw lianngan bik Bawipa Pathian, Na dawtnak kha kan cungah langhter law kan nih nih khamhnak kan hmuh lai, tiah kan nawl kan hal zungzal awk a si.
  • Pathian daihnak le hnangamnak hmuh kan duh ahcun a sinah thangtthatnak le thlacamnak in kan hal zungzal leng ah a duhnak tuah kha kan rian nganbik ah kan chiah awk a si. Kan minung sining in kan um peng ahcun hnangamnak le daihnak cu kan caah a si kho hrimhrim lai lo.
  • Nihin cathiang kan theih mi, voikhatnak le thawngttha bia ah dum kong le dum ngeitu pa kong lawngte an si. Dum a sullam cu kanmah minung pakhat cio kan thinlung hi a tahchunh duh mi a si, dum ngeitu pa kha Pathian a tahchunh mi a si. dum chungah cin mi thingthei kha kan tuahsernak a sawh duh mi a si. athawr mi kan tlai ah cun dum kha hrawh ding a si. cucaah cun, dum ngeitu pa nih ttha tein a zohkhenh mi dum cu a thawmi le a thlummi a tlai awk a si mi kha a thawr mi a tlai ahcun a thin a hung tuk lai i a dum kha a hrawh ko lai. Hrawh ding mi dum kan si lo ding kha a biapi tuk, ti nak a si.
  • Kan khua, kan umnak cio i kan Khrihfa but e zong hi Pathian dum an si ve. Minung pakhat cio kan thinlung hi dum a si bantuk in kan Khrihfa bu lungput zong hi dum a si ve. Hi kan dum te hi a lumsa mi le aa hliphlau mi dum, theitlai a ttha mi dum a si awk hrimhrim a si.
  • Kan nun chung kan rianttuannak ah kanmah ca a si zongah Bupi ca a si zongah zeitik hmanh ah kanmah nih kan ttuan lo, kanmah lawng kan si bal lo. Jesuh nih a kan um pi zungzal ko ti hi zeitik hmanh ah kan philh ding a si lo i, Bawipa ka tuah ka ttuannak cungah hin nangmah nih lam ka hmuhsak law ka hruai ko sawh, tukforhnak phun zakip chungin ka khamh ko tuah, kaa tinh mi ka ttuanchuah khawhnak lain a Thiang Thlarau in ka um pi zungzal ko, tiah thla kan cam zungzal ding a si.
  • Pakhat cio nih kan hngalh ding mi cu, Pathian nih tthatnak in a ka zohkhenh mi ka si, a ka dawt tuk mi ka si, ti hi hngalh in, ka tlai mi thingthei hi a thawr mi a si sual maw, ti kha mah le mah I purhdah zungzal ding kan si.

Add new comment

2 + 9 =