Zarhkel (30) nak Zarhpi Ni

Voikhatnak Bible -- Sirach 35 : 12 - 14, 16 - 18
Psalm - 34 : 2 - 3, 17 - 19, 23 (Lehnak 34 : 7a)

Voihnihnak Bible -2Tim.4:6-8,16-18 

Thawngṭhabia - Luke 18 : 9 - 14

Voikhatnak Bible,  Sirach 35 : 12 Zeitintiah Bawipa cu biaceihtu a si. Amah cu mi ṭanhhlei a ngei lo mi a si. 13 Amah nih misifak hna sunghnak caah mi ṭaanhnak a tuah bal lo. Hliamnak a tuarmi hna nawlpiaknak kha a hna in a ngaih piak hna. 14 Amah nih cun, ngakṭah hna thlacamnak khi i theihter lo in a um bal lo, cun nuhmei nu zong nih a lungtlinlonak a chimh tikah, a thlacamnak kha theihpiak lo in a um lo. 

16 Pathian rian kha lungthin dihlak in a ṭuantu hna cu cohlan an si ko lai, amah i nawlnak cu khuadawm cung tiang a phan lai. 17 Mi toidor hna thlacamnak nih cun khua dawm kha a vih i aa tinhmi a phanh hlan cu a ngol bal lai lo. 18 Cungnungbik nih amah kha a theihpiak hlan ahcun, a ngol lai lo, mi ding kha a sual lo tiah a ti i, biaceihnak kha a tuah hlan tiang a ngol lai lo. 

RUAH DING TETE HNA

1. Tuzarh zong thlacamnak kong ṭhiamṭhiam kan hmuh rih.
2. Farasi ti mi a sullam cu biaknak lei i hruaitu pawl minung nih anmah chan lio ah an upatmi le zohcho mi an si. anmah le anmah zong aa uah ngaimi, ka thianghlim nawlbia zulmi ka si tiah a ruahmi an si. 

3. Voikhatnak bible chung kan rel bantuk in Pathian nih a cohlanmi thlacamnak cu, nuhmei, ngakṭah le lungrethei vansang in a um mi hna an thlacamnak a theih piak deuhmi a sullam cu zeihmanh bochan awk dang um ti lo in Pathian lawng Pathian tiah lungthin dihlak le tangdornak thukpi he an camtik ah Pathian sin an thlacamnak a phan i a ngaih piak hna. 

4. Voihnihnak bible ah Paul chimmi cu Pathian rian ṭha te-in a ṭuanmi pawl an temhinnak le an hmuh hngami laksawng kong a kan chimh (Fiang deuh in chim ding). 

5. Farasi le ngun khuaikhawl tu pa an thlacam ning kan zoh tikah thleidannak zeidah a um.
- Farasi pa nih cun a suallonak kong le cheuhra cheukhat a peknak kong, a felnak kong a chim lengah ngunkhuai khawltu pa zong kha a hei thangchiat pah rih. 

- Ngunkhuaikhawltu pa cu thla a cam vanlei hmanh zoh ngam lo in ningzak ngai in le tangdor ngai in le ṭaangcumh pah in, maw Pathian kei misual pa cungah zaangfahnak ngei ko (Lk. 18 : 14) tiah a cam. Cucahcun Pathian nih a ngaihthiam i inn ah ṭinter a si a ti. Culeng ah amah le mah aa nganter mi cu tangah ṭhumh an si lai; mitang ah aa dawrmi cu mingan ah ser an si lai a ti. 

6. Hawidawt kan Khrihfa sining hi zoh ṭhan tuah u si. Zarhpi ni pumh cu tlolh bal lo, Rosary thlacam zong fel ngai, asinain mi sualphawt thiam ngai, innpa chakthlang he zong i rem set sai lo, tangdornak lungthin pakhat hmanh ngeih lo. Keimah hi a piangthar mi ka si, zohchunh awktlak ka si tiah i ruah peng ahcun Farasi pa kan lo ko lai. Sihmanhsehlaw ngunkhuaikhawltu pa cu mi vialte nih misual, a hlei in phaisa a kawltu, eihmuar ahmang mi tiah hmuh a si ko na in Pathian sin ngai thla a cam tikah cun a sualnak vialte kha aa hmuh ṭhan i ningzak ngai le tangdor ngaiin Pathian sin lukun kukbil in sual ngaihthiam a hal tikah Pathian nih a cohlan ko. Nang le kei tah aho a lo mi dah kan si hnga. Vun i chek ve cang u si.