ZARHKEL AVOI (13) NAK ZARHPI NI

Voikhatnak Bible - Fimnak 1:13-15, 2:23-24
Psalm - 30:2, 4, 5-6, 11, 12, 13
Voihnihnak Bible - 2Korin 8:7, 9, 13-15
Thawngtthabia - Marka 5:21-43

(Voikhatnak Bible hi Lai Bible ah a um lo caah kan ttialpiak hna)

"13 Zeitintiah Pathian nih thihnak kha a ser lo i, a nung mi thlarau kha hrawh awkah aa lawm lo. 14- Hung um cio awkah khan thil vialte kha a ser hna caah vawlei cung thil nung vialte nih ngandamnak kha an ngei cio; an chungah thihnak sivai a um lo i, mithi khua nih vawlei cungah nawl a ngei lo. 15- Zeitintiah dinfelnak cu thih thiam lo a si. 2:23- Zeitintiah Pathian nih minung hna cu thihnak ngei lo dingah a rak ser hna. Amah sining muisam keng in a siam hna. 24- Thihnak cu khuachia i nahchuahnak thawng lawnglawng in vawlei ah hin a rak lut, amah khuachia ta a si mi hna nih thihnak ah an phan lai"(Fimnak 1:13-15, 2:23-24).

PHUNGCHIM DING AMURU

- Zeiruangah minung hi kan thih? Voikhatnak Bible ah thihnak hi Pathian nih a sermi a si lo. Khuachia fale a si mi hna nih thihnak ah an phan lai tiah fiang tein kan hmuh.
- Jesuh vawlei ah a ratnak cu thihnak hrawh dingah a si. Pakhatnak thihnak hrawh ding cu thlarau thihnak a si i pahnihnak ah pumsa thihnak a si. Thihnak kha amah nih a kan teipiak hmasa biknak cu thihnak in a thawh `hannak kha a si. Amah a zummi vialte amah bantuk in thihnak kan tei lai i kan tho tthan ve lai.
- Thawngtthabia chung kan hmuh bantuk in, Jesuh cu damnak bawibik doctor vialte nakin a thiambik le mithi hmanh a thawhter khotu tthawnnak a ngeitu a si ti kha kan hngalh ahcun lung awttawm lo in kan zumh khawh a hau.
- Thihnak hi pahnih in hmuh khawh a si. Thlarau thih le pumsa thih ti ko usih. Thlarau thih timi cu zungzal meikaang ram ah um khi a si (siloah) Pathian he i tthen, pumsa thih cu taksa le thlarau i tthen khi a si i Bible nih cun thih a ti lo (Biathlam 2:11, 1Korin 15:54). Zungzal in a nung dingmi cu thlarau kha a si. Pumsa cu leidip in sermi a si caah nikhatkhat ah leidip ah aa cang `han a hau (Gen. 3:19).
- Zungzal a nung dingmi kan thlarau hi Pathian he i tthen lo dingah cun kan nunchung kan pumsa le kan thlarau an i fonh lio ahhin Pathian duh ning in kan um a hau.
- Pumsa thihnak cu zungzal nunnak vanram ah lam a kan hruaitu innka chung kan luh khi a si. Minung nih cun pumsa thih hi kan ttih bikmi a si. A ruang cu thlarau thih kha kan ruat kho lem rih lo caah a si. A ngaingai cu pum le thlarau an i `hen hnu i thlarau nunnak kha biapi deuh in kan ruah awk a si.