ZARHKEL AVOI (28) NAK ZARHPI NI 

Photo Credit

Voikhatnak Bible - 2Siangpahrang 5 : 14 - 17 

Psalm - 98 : 1 - 4 (Lehnak 98 : 2) 

Voihnihnak Bible - 2Tim. 2:8-13

Thawngṭhabia - Luke 17 : 11 - 19 

 

RUAH DING TETE HNA

1. Zeiruang ah biakinn na phanh tiah biahalnak um sehlaw zei tindah kan leh cio hna hnga? 

-A cheu nih cun Zarhpi ni thianter awk ah, ka herh baumi vialte Pathian sin hal awk ah, ... hawikom he i ton duh ruangah ... hlasak a nuamh ruangah ... tbk in aphunphun chim cio a si ko lai. Aphi hman taktak cu Pathian nih ka cungah a tuahmi thil vialte caah lawmhnak chim ding le biak, le thangṭhat awk ah ti hi a si. 

2. Naaman kong nih zumhnak le bochannak he profet Elisha sin a kal tikah Jordan tiva ah Voisarih aa hnim i damnak a hmuh taktak. Naaman lungthin chungah a um mi cu, mah ka zawtnak hi cu a dam kho ti lai lo, ti hi a si. Sihmanhsehlaw damnak a hmuh taktak tikah Pathian thangṭhat lo le lawmh lo in a um kho lo. Zei Pathian hmanh ka bia ti lai lo Israel Pathian lawng ka biak cang lai tiah biachahnak a ngei. 

3. Naaman nih damnak a hmuh tik ah Elisha kha laksawng tampi pek a duh asinain Elisha nih ka Bawipa a nung lio ko a ti i a la duh lo. Sihmanhsehlaw Elisha sinum pa Gehiza nih a theih tikah Naaman a kal le cangka a dawi i a lih in laksawng a hal. Naaman nih a pek ve ko. Sihmanhsehlaw Pathian nih Gehiza a hakkauh le a duh fah a hngalh tikah cun a donghnak ah Naaman thinghmui zawtnak kha a mah lawng silo in a tefa sin tiang a phan dih. Zeitluk in dah ṭihnung a si. 

4. Jesuh nih a damter mi hna, mi thinghmui Pahra kan zoh ah cun ... an dam lo lio ah cun Jesuh cu damnak a si ti an hngalh an bochan i an fuh. An dam taktak tikah Samaria mi pa pakhat lawng nih Bawipa, kaa lawmtuk tiah lawmhnak bia a va chimh. Adang Pakua nih an chim ti lo. Jesuh nih lawmhnak bia a chimtu pa kha laksawng pahnih a pek, thinghmui in damnak le sualsal in luatnak. 

5. Khrihfa vialte kan rian cu Pathian sin lawmhnak chim hi a si. Ahal lawng kan thiam i lawmh kan hngal ti lo. Thinghmui zawtnak ngei Pakua bantuk a si mi kan tam tuk. Kan i lawmhnak kha a hlu peknak zong in langhter ding a si.

6. Pathian sin lawmhnak kan chim hnga ding mi cu ... Nifatin kan nunnak ah thaw a kan pek, minit, sehkanh, suimilam, ni, thla, kum in kan thok ding a si. Cu lengah ei, um, hruk ding ca a kan pek mi vialte caah le a sermi thil thingkung, tiva, pangpar, saram, ni le thlapa, thli ... tbk caah hin nifatin lawmhnak kan chim awk a si i kan i lawmhnak langhter dingah a tuah mi thil vialte hi upat le dawt awk kan si. 

7. Nihin Salm hla chung kan theih bantuk in ... vawlei mi vialte hna, lunglawm in Bawipa cu hla in thangṭhat u, lawmhnak hla in thangṭhat u law a au in au u (Salm 98: 4). 

Add new comment

12 + 7 =