ZARHKEL AVOI (33) NAK ZARHPI NI 

Voikhatnak Bible - Malakhi 3:19-20a
Psalm - 98:5-9 (Lehnak 98:9) 

Voihnihnak Bible - 2Thes. 3:7-12
Thawngṭhabia - Luke 21:5-19 

RUAH DING TETE HNA

1. Hmaizarh cu Khrih Siangpahrang puai kan tuah lai i biaknak kum 'C' kum cu a dih cang lai. November thla 27 ah khin cun 'A' kum a thoknak Advent zarhkhatnak kan phan cang lai. 

2. Malakhi ti mi a sullam cu "My messenger" = ka bia a phortu tinak a si. Profet vialte hi messenger an si dih. Nihin Malakhi chung kan hmuh mi cu misual pawl meichung paih an si lai nak le miding pawl lawmhnak an hmuh lainak kong kan hmuh. 

3. Nihin cathiang nih a kan cawnpiakmi kan vun zoh dih ahcun caan donghnak kong lawngte an si. Atu kan zumhning cio te hi le Pathian sin zumhtlak kan si maw si lo ti hi kan ruat ṭhan bal maw. Kanmah le kanmah cami puai kan tuah bal maw? Atu minung kan caah cun vawlei caan dongh hi kan thih ni cio khi a si ko lai. Ka thi te lai ti cu ahopoh nih kan hngalh cio. Asinain ani le a caan cu ahohmanh nih i hngalh a si lo. Kan hngalh khawh cio lo mi caan caah timh tuahnak kan ngei cio cang maw. Kan zumhnak le kan tuahṭuannak hi khuazeidah a phanh cang hnga. Hell lei maw kan neih deuh vanram lei dah. 

4. Thawngṭha bia chung kan hmuh mi Jesuh chim mi, vawlei caan dongh lai ah cun hmelchunhnak a chimmi hna hi a tu ah kan ton cuahmah cang ko lo maw. Vawlei cung thawng kan theihmi hi raltuknak le i thah i nawnnak, lihninhnak, mangṭaam, Khrihfa hremnak ... tbk ... lawng te theih a si cang. Thinlung chungah a nuam kho hrimhrim ti lo. Thinphan thlalaunak lawngte an si dih cang. 

5. Khrihfa kan si hnawhchan mi hi kan nunchung kan pumsa nih nuamhnak a tlinh lai ti hi a si lo. Pumsa hi cu a herh ahcun temhinnak a tuar a hau. Thlarau thianhlimnak caah a pumsa nih a tuahṭuan le a intuar a hau hrimhrim. Lk. 21 : 16 - 19 ah kan hmuh bantukin kan unau, rualchan, hawikom hmanh nih an kan hlawt te lai i a cheu cu thahnak hmanh kan huah te lai. Jesuh ruangah mikip huat kan tong te lai. Asinain hnangam awk ngai pakhat cu "nan lu cung nan sam fa fakhat hmanh a tlau lai lo" a ti. Fekte in kan dir a hau. Zungzal nunnak hmuhnak caah kan nunnak cu fakpiin kan khamh a hau. 

6. Caan dongh ni a phanh tikah ready kan sinak hnga zumhfek te dir bu in sualnak le tukforhnak kha tei i zuam usilaw thilṭha tuahnak le intuar khawhnak thazaang he hmailei ah fong chin hna u si.