ZARHKEL VOI (25) NAK ZARHPI NI 

Photo Credit

Voikhatnak Bible -Amos.8:4-7

Psalm - 113:1-2, 4-8 (Lehnak 113:1,7)

Voihnihnak Bible -Tim.2:1-8

Thawngṭhabia - Luke 16:1-13

RUAH DING TETE HNA

  1. Hmailei zei bantuk nunnak caah a tu ahhin zeidah naa khon. Chim duhmi cu, Hell ram caah maw vanram caah. 
  2. Atu kan ngeihmi caan, thilri, phaisa vialte hi zeiah dah kan hman lai ti mi bia halnak hi a sullam cu kan nun chungah zei khi dah a biapi bik ti hi a si. Minung tam deuh nih cun kanmah ca, keimah ca ti mi ruahnak lawng kan ngei tawn. Midang hartong mi, hmeinu hmeipa, sifak santlai lo mi hna caah tiah siannak a ngeimi minung hi tlawmte lawng an si tawn. Nang le kei tah khuazei zawn ah dah kan dir. 
  3. Jesuh nih a kan chimhmi cu zungzal a hmun hnga ding caah thilri, khong uh a kan ti. Zungzal ahmunmi thilri cu hi vawlei cung ah a um maw. Nang le kei tah vawlei cung ah hin zungzal kan hmun lai maw. Angai ngai ahcun zungzal ahmun hnga dingmi cu vanram caah kan hmanmi poh kha a si ko. 
  4. Dinfelnak, zawnruahnak, siannak le pekchanhnak hna nih hin vawlei cung thilri vialte hi an uk awk hna an si. Asinain minung sining ahcun hi thilri vialte hi hakkauhnak, pawrhlawtnak, mahzawn lawng ruahnak le nahchuahnak hna tu nih an uk deuh tawn. 
  5. Mirumpa thilri cazin tlaitu mihrokhrol pa kong Jesuh nih a kan chimh. A hrokhrol ko nain a fim zer caah a Bawipa nih a thangṭhat. Zeiruang ah, midang he hawikomhnak, dawtnak an ngeihnak hnga caah thilri kha siangngai in a hman. Pingpalo in cazin a ṭial ter ko hna nain amah nih pakhat hmanh aa laak lo. A sullam cu dawtnak kawl a thiam tinak a si.
  6. Mah pakhat ca lawng ruah le hakkauhnak hna i an ral nganbik cu siannak a si. Thil sining tein siannak a ngeimi cu sifah ter si lo in a let zakhat in rumnak pek a si. Siannak nih thinlung thlarau a kauhter i, duhfah hakkauhnak a bit ter. 
  7. Leicung kan nunchung kan ngeihmi thilvialte hi kanmah taa a si lo. Pathian taa lawngte a si ti hi fiang tein hngalh ding kan si. 

 

 

 

Add new comment

4 + 11 =