ZARHKEL ZARHLINAK ZARHPI NI

Voikhatnak Bible - Zefaniah 2 : 3 - 3 : 12 - 13

Psalm - 146: 7 – 10 (Lehnak - Lungthin in sifakmi cu lunglawmmi an

va si dah. Vancung pennak cu anmah ta a si.)

Voihnihnak Bible - 1Kor. 1: 26 - 31

Thawngṭhabia - Mt. 5: 1 – 12

Ruah Ding TETE

1. Jephaniah hi profet hme a si i Jeremiah hlan deuh te i a chuakmi profet a si.
2. Jephaniah profet chan lioah hin Israel miphun hna hi khuachia biak leiah an ṭhangcho thluahmah i Pathian nih hi profet hi a thlahmi a si. Hruaitu pawl nih lamping ah zapi kha an hruai cuahmah hna. Sifak santlailo pawl an nehsawh hna i heh tiah an hrem an serhset hna.
3. Profet Zephaniah a chimmi cu, Pathian kawl cang uh. Pathian he nan i hlat tuk cang. A rauh hlan ah Pathian thinhunnak nan tuar cang lai. Toidawrnak, dinfelnak le zawnruahnak in Pathian leiah i mer cang uh, tiah a chimh hna.
4. Caan tlawm a rauh ahcun mirum le hruaitu pawl le zungthiam hna cu sal ah an tlaih dih hna i Jerusalem khuapi zong cu hrawh a si i ṭiaṭumlo le santlailo sifak hna lawng nganhtaak an si. An sifahnak nih a khamh hna kan ti lai cu. Kum caan saunawn a rauh tikah cun Judah miphun pawl kha an ramah kir ṭhannak nawl a pek ṭhan tik hna ahcun hlanlio pi i an rak kal taakmi hna sifak santlailo sin te ah khan an kir ṭhan hna.
5. Jesuh nih a huatbikmi cu sifak pawl dawtlo le chambaunak tampi ngeih hi a si. Chambaunak tampi ngeih ti mi a sullam cu sifah a si. Jesuh nih mi sifak kan si ding hi a duh hrimhrim lo. Asinain a si a fak mi dawtlo zong kha a huat tuk ṭhiamṭhiam rih.
6. Nihin thawngṭhabia chung kan theihmi "Sifak" timi a sullam cu "Lungthin chungah Pathian lawng aa bochanmi" tinak a si. A sullam cu zeihmanh a ngeilo mi kan si tikah bochan awk kan ngei lo. Acheusifak pawl cu unau a bochanmi le mirum aa bochanmi ti bantukin bochan awk an ngei i Pathian kha an philh cang. A cheu cu leicung thilri phaisa an ngei an rum ngai ko nain Pathian dah ti lo cu bochan awk kan ngeilo an ti i an chawva le an phaisa ah khan bochannak an ngei ti lo. Pathian duh ning um lawng an i zuam. Mah bantuk pawl kha "Sifak" lungthin in a sifakmi cu an si i thluachuah tampi an hmu chinchin. Zeitluk kan si fah zongah kan lungthin chungah a lak hmuhnak lawng kan ruah ahcun Jesuh nih a kan daw hlei lailo.