Zarhkhatnak Advent Zarhpi Ni

Photo Credit

Saturday, November 28, 2020

Na dawt tuk mi pakhat khat nih khua dang ram dang ah kal in bia an cah ta mi: “ka rak kir zau ko lai” a ti tikah zeitin dah a rak tlun than ding kha na hngah hnga? Zeihmah tuah lo in maw na um ko hnga, si lo ah a rak tlun lai nak caan zeitluk in dah naa ngaih ti mi le kan hngah peng ko ti in pehtlaihnak capar tial in na hngak hnga lo maw? Bawipa nih a rat lai nak kong he pehtlai in nihin kan theih kan rel mi Thawngtha chung in a kan chimh.
Chawva ngei mirum hna nih an rian kong he pehtlai in khualtlawn an i thawh tikah an zumh mi sinum maw sal hna sin ah an thilri tha te zohkhenh ding in an fial tawn hna. Cu tik lawngah hnangam tein khual an tlawng kho tawn.
Thil zohkhenhtu hna zumhtlak an si ning cungah an bawi le nih laksawng an pek tawn hna. A fel mi sinum hna nih an bawipa a rak phanh hlan chung a tuah ding mi thil hna kha tha te le fel tein a tuah tawn i zumhtlak tein a um zungzal.
Advent caan hna nih caan a dih lai nak kong he pehtlai in ralring tein um ding in a kan cawnpiak zungzal hna. Caan a dih lai nak ni cu Khrih Bawipa a voikhat nak a rak ni in aa thawk i, a voihnih nak a rak lai nak in a dong te lai. Cu a si caah, ralring te le thlacam bu in i hlau ngai in hngah ding ah Bawipa nih a kan cawnpiak. Profet Isaiah nih: “Ahmaanmi thil tuah duhnak a ngeimi khan a bawmh hna i nangmah nih cutin um hna seh ti na duhning a philh lomi cu na lawmh hna” tiah a ti (Isaih 64:5).
Advent caan nih i hlau ngai in um ding le Bawipa rat lai nak ni kha a thianghlim mi nun zia in hngah ding ah ralrinnak a kan pek. Kan thinlung le kan nunzia i dah in Bawipa cawnpiak mi nunzia in kan nun khawh cio nak hnga thlacam buin timhtuahnak ngei zungzal hna u sih.