ZARHKHEL A VOI (12)NAK ZARHPI NI

PHUNGCHIM DING AMURU

• Tuzarh kan theih mi cathiang hna hi a tlangpi in kan zoh tikah harsatnak chungin teinak (aphi) ti zong in ti khawh a si. Zawtfah harsat nak hna hi sual nak ruangah a hung chuah mi an si ko na in Pathian zumh ruangah phun dang hneksak nak hna zong tampi an um rih ko hna. Kokek rawhralnak, ngeihchiah chawva sunghnak, chungkhar chungah i rem lo nak, zumhnak ruangah hneksak intuar nak tbk, hna tampi an um len rih ko hna.
• Job cu Pathian a ttihzah mi mirum pakhat a rak si ko na in a zumhnak hneksak a si tikah Pathian hmanh kha a mawh chiat. Cu cu Job nih Pathian timhpiak mi a theih khawh lo caah a si. Pawngkam a hawi le hna nih ning cang lo in thazaang an pek tikah Job zong lung dongh aa tim. Sihmanhsehlaw, Bawipa nih a lianngannak kha a hmuh sak `han tikah a lung a hung fim. Nifatin kan ton cio mi harsat nak hna cungah kan zai lengmang tawn ve hna maw? Midang nih harsatnak kan ton tikah kan zumhnak he pehtlai in zeitin dah thazang a kan pek cio?
• Rili cungah lawng in Bawipa le a zultu hna an kal lio ah thlichia nih a tlak hna. Zultu hna cu `ihphang thlalau in an um i zeizong vialte lakah Bawi a si mi Jesuh tthawnnak le thil ti khawhnak kha an philh i: “Saya, kan thih dengmang cang ttung, zei poi loin maw na um ko” tiah an mawh chiat. A bia kaa khat in zeizong vialte a si ter kho tu Bawipa nih zultu hna kha: “Zeicahdah cu ti hringhran in nan thin a phan” tiah a ti hna. Harsatnak le ngeihchiatnak kan ton tikah: “Nan sinah a zungzal in, caan dongh tiangin ka um lai” (Matt 28:20)tiah a ti mi Bawipa kha ruah `han in panh ding a si.
• Lawng he aa lomi Bupi chungin thlichia hrannak rili cungah khual a tlawng lio mi kan nih hna zong Bawipa kha panh cio ding a si. Minung thazang nih Bupi cu a khamh kho lai lo; sihmahsehlaw Bawipa nih a pum a si mi Bupi cu a zohkhenh zungzal lai i a khamh zungzal ko lai.
• Mithiang Paul nih cun: “Cucaah ahohmanh hi, minung rel in kan tah ti hna lo. Voikhat cu Khrih kha minung rel in kan rak tah ve, sihmanhsehlaw atu cu cu bantuk cun kan tah ti lo” (2Cor 44:16) tiah a ti.