Zarhlinak Advent Zarhpi Ni

Photo Credit

Sunday, December 20, 2020

Advent cu a dih cuahmah cang i Christmas nih inn ka pawng te-ah a kan hngah cang. zarhthum li chung Bupi nih a kan chimh lengmang mi cu, “Ra tuah u, lukun in bia hna u si, ti hi a si.” Christmas caan zong nh hin a kan sawm chih ve lengmang mi cu, Bawipa cu a ra cang, ra u law bia hna u si, a kan ti thiamthiam rih.
Adam le Eve Pathian nawl an ngaih lo ruangah Pathian nih chiat a serh mi hna cu, Nangmah le Nu cu nan i hua lai, a tefa le na tefa cu ral an si lai, mi nih na lu kha rial an i zuam lai, nang nih an kedil kha cuk naa zuam ve lai, tiah a ti hna. aruang cu minu kha rul nih a tukforh khawh caah a si. asinain kum caan sau pi a roh tik ah, minung cu Pathian nih a kan dawt hringhran caah kanmah khamh ding ah a fapa kha a kan pek than.
Pathian nih a kan dawtnak hi vun ruah lengmang ah cun khuaruah har taktak a si ko. Minung cu amah nih a kan sermi kan si i a nawl kan ti lo. Rul bia tu kha kan ngaih deuh cang. sihmanhsehlaw, Pathian nih cun rul kutchung um ding kha cu a kan siang lo i, a mah sin kir than khawhnak lam a kan sial piak than.
Na mitthlam ah hei cuanter ve hmanh, Eden dum in dawi kan si nak khan Pathian nih mah ti khan va um cang ko hna seh, chimh ngai lo mi cu rak kan ti sehlaw, zei ko khi dah kan lawh hnga? Saram bak kan si ko lai. Hnipuan zong hruk lo in, taklawng in kan vak hnga i ruah ngam zong a si lo. Asinain amah sin kir than khawhak ding lam a kan onh piak than. Hi lam cung zoulh dingah hin duhthim nak le zalonnak a kan pek chih.
Pathian lei kan kir than khawhnak ding caah hmasabik lampi cu Mary a si. Mary nih Pathian bia kha a ngaih i, Bawipa na bia bangin ka sin ah tlung ko seh, tiah a chim khawh ruangah Jesuh cu pek kan si.