Zawnruahnak

Photo Credit

“Biatak kan chimh hna: facang ci pakhat cu vawlei ah tuh a si i a thih ta lo ahcun pakhat lawng a si peng ko. A thih ta lawngah facang mu dang tampi a chuahter khawh.”(Jn 12:24)

Jesuh nih hi tahchunhnak bianakbia hi zeiruangah dah a hman tiah cun zeibantuk thil paoh hi fawi tein hmuh khawh an si lo timi kha theihter a kan duh caah a si. Thiamsannak a cawng mi hna nih mah duhnak sum in an cawnmi ca cungah an lung ṭha tein an chiah khawh lawngah theih hngalhnak ṭha an ngei kho lai i an cawn mi hna cungah thiamnak an ngei lai. Fahnak intuar hmasat loin duhtlin hnangamnak hmuh khawh a si lo. Mah taksa duhnak lawng ruah a ngah lo. I sumnak a herh zungzal.

Cancer zawtnak in a zawmi pa pakhat a rak um i a zawtnak in ka dam kho ṭhan ti lai lo timi aa hngalh tikah Pathian sinah biahalnak a tauh mi cu “Bawipa, zeiruangah dah hi zawtnak hi ka cungah na tlunter?” tiah a ti. Hi zawtnak inntuar dingin cun kaa ruah mi zong a rak si hrimhrim lo. Sihmahsehlaw Bawipa nangmah nih tuah seh ti na ka duhmi a um a si ahcun ka inntuar ko lai” tiah a ti i cu ni thawk in lahkhah tampi a rak hmuhnak a rian khan a chuak i mipa cu Thawngṭhabia phuan hram aa thawk. Cun thawngṭhabia phuannak lawng te zong ah khan a caan vialte kha a hman hna. Cutin a thih hlan caan tawite a ngeih mi chung te ah khan tharau tampi kha Jesuh sinah a phanhter khawh hna ti a si.

Dawt mi u le nau hna kan nunnak ah kan i ruah lo pi in kan tonmi  thil hna hi kan caah sullam tampi a ngei mi zong an rak si ziar kho tawn. Siangbawi pakhat nih a chimmi cu: “Pathian sinah fimnak ka hal i a ka pekmi cu nikhat hnu nikhat a phichuah dingmi harnak(problems) hna kha an si ee,” tiah a ti.

Jesuh hnu a zul mi hna paoh nih cun mah zawn lawng ruah khawh a si lo. Mah zawn lawng ruahnak timi lungput kan ngeihmi kha thihter hrimhrim ding a si.  Hi kong he pehtlai in Jesuh Khrih a nunnak ah hin fiang tein kan hmuh khawh mi a si. “Jesuh Khrih a thihnak le a thawhṭhannak thawngin kan nih vialte hna nih nunnak kan hmuh ṭhan” timi kha kan theih zungzal ding a si. 

 

Add new comment

9 + 0 =