Zawnruahnak lungthin

Photo Credit

“Mi tampi kha a damter hna i a zawmi paoh nih cun amah an tongh khawh ngakhnga heh tiah an i zuam.” (Mark 3:10)

Nihin Missa raithawinak chungah kan relmi thangṭhabia thiang (Mk 3:7-12) chungah mi tampi nih Jesuh an zulhnak kong kha kan hmuh. A zultu an tamtuk hringhran caah “an ka naan sual lai ti kha a phan caah Jesuh nih cun a zultu hna kha lawng pakhat in ka timhpiak tuah u” tiah a ti hna. Minung hna nih Jesuh sin in an i ruahchanmi le an duh mi cu damnak hmuh ṭhannak timi a si caah heh tiah an buut nak zong hi a si. Jesuh nih cun minung hna caah a si khawh chung in aa pe ko, an zawtnak in a damter ko hna. Sihmanhsehlaw minung hna lei kap in kan zoh ṭhan a si ah cun Jesuh sin in zei dah kan hmuh lai, timi ruahchannak lawng te ngeihin an zulh ti cu a fiang ngai mi a si ko. A fawi nak in chim ah cun mah zawn lawng aa ruat mi minung kan sinak kha nihin kan relmi cathiang chungah fiang tein hmuh khawh a si ko. 

Jesuh sin a ra mi hna hi Galilee ram, Judea ram, Jerusalem khua, Idumea ram, Jordan tiva ral ram le Tair le Sidon khua pawngkam i a ummi khua hna in a ra mi an si tiah a ti(Mark 3: 7-8). Kan Bawipa Jesuh zong cu a minung sinak in a tha a ba tuk hringhran cang ko lai, i dinh zong a duh tuk ve ko lai. Sihmanhsehlaw minung hna a kan dawt tuk hringhran caah a sin a ra mi paoh kha an zawtnak in damnak a pek ṭhan ko hna. Cun khuavang a ngeimi paoh nih amah an hmuh tikah khan a hmaiah cun an tlu, “Pathian Fapa na si,” tiah fak piin an au tiah a ti. Sihmanhsehlaw Jesuh nih cun thlarau ṭhalo hna cu, aho a si kha, ahohmanh nan chim hna lai lo, tiah fek tein a ti fawn hna(11-12). 

Dawt mi u le nau hna, Jesuh Khrih hi kan caah teh aho dah a si ve? Pathian Fapa a si kha kan thei ve hna maw, kan cohlang kho taktak ve cang hna maw? Jesuh he pehtlaihnak ṭha teh kan ngei ve cang hna maw, asiloah Bible chungin theihmi messiah ka Khamhtu a si ti men lawngin maw a si? Jesuh sin kan rat tikah kanmah duhnak lawng maw kan hal, Amah sinah lawmhnak chim dingin le thangṭhat dingin teh amah sinah panh, biakinn lei kan panh kho cang hna maw? 

Abikin Jesuh he pehtlaihnak ṭha ngeih kan duh taktak maw? Pehtlaihnak ṭha taktak kan ngeih khawh a si ah cun thlachuahnak tampi a hmu mi kan si ti kha hngalh ding a si. Khrihfa kan si caah mah duhnak lawng kha kawl loin, mah zawn lawng kha ruat loin Jesuh lungput kha kan ngeih ve ding a si. Cucu Pathian caah siannak lungthin ngeih kha a si ko.

 

Add new comment

1 + 0 =