Zei lam dah kan i thim? (Luke 9:22-25)

“Mi Fapa nih hin temhinnak tampi ka in hrimhrim lai; upa hna le tlangbawi upa hna le Phungbia cawnpiaktu saya hna nih an ka hlawt lai. An ka thah lai i ni thumnak ni ah thawhter ka si than lai,” tiah a chimh hna (Luke 9:22).

Kan Bawipa Jesuh Khrih nih a zultu hna sinah hitin bia a chim tikah a zultu hna zeitlukindah an lung a rawh hnga i an lung re a theih hnga? Jesuh hnu zultu hna nih an rak zulh hmasat lio ah khan an rak i ruahchanmi cu Jesuh nih nihin ni ah a chimmi bia he cun aa khat hrimhrim lai lo. Jesuh Khrih nih thawngthabia a rak chim a rak phuan lio, mizapi nih an rak zulh i Jesuh bia chimmi an rak ngaih cio lio, mikip nih Jesuh an rak thangthat cio lio caan ah khan cun zultu hna cu an hmai a rak hngal ngai ko. Sihmahsehlaw Jesuh nih an ruah ballo mi bia a chim tikah zeitluk in dah an lung a tuai hna hnga?

Cun Jesuh nih hitin zultu hna sinah ngaihchiatnak bia a chim tikah zultu hna zong an lau ngaingai ko lai. An Bawipa caah himnak a um ti lo ti an theih cu an ca zongah himnak a um ti lo ti a si ve ko. Kan nih pakhat cio hna zong hi teh zeibantuk himnak khi dah kan kawl cio mi a si ve hnga?

Minung siseh, saram si hna seh, ahohmanh a him lonak hmun ah um an duh lo caah hmun khat hnu hmun khat, khua khat hnu khua khat in an zaam an i thial hna i a himnak hmunhma an kawl cio hna. Tu lio caan kawl ram chungah siseh, Ukrine ram ah siseh, kahdohnak a um tikah a himnak hmun a si lai tiah ruahnak khua le ram cio ah an zaam cio hna nak kong zong tu lio caan ah hin theih cio mi a si. Hihi cu taksa lei in himnak hmunhma kawlnak kong a si.

Jesuh Khrih nih cun a zultu hna kha taksa lei in himnak hmunhma kawl dingah a fial hna lo. A hnu zultu an si ahcun mah duhnak hlawt ding tu kha a cawnpiak hna. Nihin kan relmi cathiang chungah Jesuh nih, “Ahohmanh nih zulh nan ka duh ahcun mah zawnruahnak kha nan ngol lai i nifatein nan vailam kha nan i put lai i nan ka zulh lai. Zeicahtiah mah himnak lawng a rauatmi cu a nunnak kha a sung lai, sihmanhsehlaw keimah ruangah a nunnak a sungmi cu khamhnak kha a hmu lai. Mi pakhatkhat nih vawlei hi a dihlak in co seh law amah cu lotlau tung seh law, asiloah rawkral tung seh law, zeital a miak hnga maw? Miak hlah,” tiah a a ti (Luke 9:23-25).

Cuasicaah dawtmi u le nau hna harsatnak kan ton tak cio a si ahcun aho hnu le cawnpiak nak kha dah kan i thim hna lai i kan zulh hna lai. Bawipa le a thawngthabia caah siseh, Pathian muisam in sermi minung pawngkam ummi hna caah thatnak le thluachuah a um khawh nak hnga caah tiin Jesuh hnu zultu tha kan sinak kha langhter khawh i zuam zungzal hna u sih.

Mithiang Paul nih: “Khrih Thawngtha nih si hna seh ti an duhmi hna kha nan nuncan si awk a si” tiah a ti (Filipi 1:27).