Zei lam dah kan zulh

“Mi Thalopa sin khan khamh ko hna ti kha kan nawl.” (Jn 17:15)

Pi Si cu lung rethei vansang in a um ko. Zeicah tiah cun cabuai cung i a philh tak mi tangka pia kha a fapa te nih aa dolh sual caah a si. A fah tuk ah a aw hmanh tha tein a chuah kho ti lomi a fapa te kha aa pom buin an pa cu a ttah bu cun a hei auh i, “kan fapa nih tangka pia aa dolh sual, siibawi te sin ah chawn zokzok,” tiah a hei ti. An pa cu a ra i a phone cu aa chuah i siibawi te sin ah chawnh loin an church (Pastor-Siangbawi) pa kha a hei chonh. Cu tikah an nu nih, “Ziah! Siibawi te chonh hna loin (Pastor-Siangbawi) cu na chonh; a tu ah (Pastor-Siangbawi) kan herh lo, siibawi lawng kan herh” tiah a ti. An pa nih a leh mi cu, “kan (Pastor-Siangbawi) pa nih aho sin paoh in tangka a lak, a chuahter khawh,” tiah a ti.

Jesuh nih, “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai I pakhat tu kha cu zei ah nan rel lai lo. Pathian le tangka cu an rian nan tuan kep kho lai lo,”(Matt 6:24) tiah a ti.

Mithiang Paul zong nih, “Tangka duhnak hi that lonak phun kip chuahnak hram a si. mi a cheu cu tangka ngeih an duh tuk caah zumhnak kha an kaltak I ngaihchiatnak a phunphun an tong,” (1Timothy 6:10) tiah a ti ve.

Dawtmi u le nau hna, tangka timi lawng siloin duhfah hakkauhnak a ngan tuk a si ahcun, taksa duhnak lawng hmai kan fon ter a si ahcun mithalopa (Satan) kut chungah kan tla sual lai. Pathian sin phanh kan duh a si ahcun kan mah duhnak kha hnu ah chiah in Pathian duh nak kha kan tuah kan zulh a herh.

Jesuh nih, “Cucaah zei dang vialte nakin Pathian Pennak le zeidah tauh hna seh ti a kan duh timi kha biapi deuh in ruat u law thil dang vialte hna zong hi an pek thiathiam ko hna lai,” (Matt 6:33) tiah a ti. Ruat ve hmanh!