Zeibantuk nunzia dah kan i him hna lai?

“Voi khat cu mirum pakhat a rak um i a puan man sung bikbik in aa thuam i nifate in nuam ngaingai in khua a sa. Cun misifak pakhat, a min Lazaruh an timi zong kha a um ve i hma nih a pumpaluk in a tlunh. Mirumpa cabuai in a thlami rawl tiltlawt khan ka khim lai ti i ruahchan in mirumpa innka hram ah khan an rat pi tawn. Cun uico kha an ra i a hma kha an liahpiak tawn.” (Luka 16:19-21)

micheu khat cu pawngkam ummi hna cungah zawnruah thiamnak ngeih loin apoilo timi mah zawn lang ruahnak lungput a ngei mi an um. Apoilo timi lungput nih pawngkam thil sining hmuh khawh lo tian in a umter hna. An ei an ding i an i nuam sawhsawh ko. Keimah nih ka ngeih mi ka thilri ka duhduh in ka tuah ka hman ko lai teh, zeidah apoi tiin an um.

Jesuh Khrih nih a kan cawnpiak mi (Luka 16:19-31) chungah mirupa le Lazaruh kong te kha vun ruat ta hmanh hna u sih. Mirumpa nih zeibantuk sualnak le palhnak hna a tuah hna tiin kan hmu lo. A salnu a salpa hna kha a tuk a velh hna timi zong kan hmu lo. Sihmanhsehlaw a innka hram ah mirumpa nih a tantak mi eidin pelpawl te hmanh he ei kho hnga maw tiin nifatin a hngak zungzal mi Lazaruh timi, amah bantuki minung pakhat a simi pa sining kha a hmuh lo caah a si. Phundang in kan chim a si ah cun aa hmuhter duh lo, aa theihter duh lo caah a si. Zeicahtiah cun a innka pawngah nifatein a ra mipa cu a hmuh awk hrimhrim a si.

Kan pawngkam ah harsatnak a tongmi tampi an um. Kokek ruang zongah a si kho, raltuk ruang zongah a si kho. Harsatnak a tong mi mi tampi an um. Bawmh ding mi hna le bawmhnak a herh mi hna tampi an um. Kanmah pumpak in bawmhnak kan pek khawh mi hna zong tampi an um ko. Hitin thil a si lio caan ah apoilo timi lungput kan ngeih sual a si ah cun mirumpa bantuk kan si sual lai.

Kan pawngkam thil sining hmuh thiam kan herh, zoh thiam zong kan herh. Zoh sawhsawh le hmuh sawhsawh lawng siloin an tontak mi hna kha kan theihthiam pi tak hna ding hi a herh ngaingai. Jesuh Khrih nih, “Ka rawl a tam i rawl nan ka pek, ka ti a hal i ti nan ka pek; khual ka si i nan inn ah nan ka tlunter. Puan aih awk ka ngei lo i puan nan ka pek; ka zaw i nan ka zohkhenh; thong ka tla i nan ka len,” tiah a ti hna lai (Matthai 25:35-36). Cun “Ka unau pakhatkhat cungah, zeitluk hmanh in sifak le nauta si seh law, nan tuahmi thil paoh hi ka cung i nan tuah a ti,” tiah a ti (Matthai 25:40).

lazaruh cu zeitluk hmanh in sifak in le hmaput in um ko hmanhsehlaw mirumpa cungah nahchuahnak lungput a ngei timi kan hmu lo. A intuar mi fahnak hna kha dai tein a in ko hna. A thih tikah a rak nu lio i a rak sining bangkhan thluachuah a si ko. Midang cungah nachuahnak lungput ngeih lo hi thil tha taktak i nunpi a si. Mirumpa tu cu a pawngkam ummi hna cungah zeirel loin a rak um caah a thih hnu ah a nun lio i a rak tuahser ning bang khan a cungah tuah a si ve ko.
Dawtmi u le nau hna zeibantuk ruah ning le nunzia dah kan i thim hna lai; mirumpa lungput maw Lazaruh lungput dah?