Zeidah kan i thim lai? (Matthew 5:20-26)

“ ‘Lai va nawng hlah u, lai a nawngmi paoh cu biaceihtu hmaiah chuah pi a si lai, tiah hlanlio mi an rak ti tawn hna, ti kha nan theih. Asinain kei nih cun, ‘A u a nau cung i a thin a hungmi paoh cu biaceihtu hmaiah chuahpi nan si lai i a u siseh, a nau siseh, “Zeiruaramlo,” a timi paoh cu biaceihtu bu sinah chuahpi nan si lai; cun ahohmanh, a u siseh, a nau siseh, “Mihrut” a timi paoh cu hell mei chung i tlak awkah aa tlakmi nan si lai,’ kan ti hna.”(Matthew 5:21-22)

Nihin ni caah Bupi nih ruah ti dingin le thazaang lak ti dingin a kan thimpiak mi cathiang (Matthew 5:20-26) chungah hin Jesuh Khrih nih thinhunnak, rem lonak, huatnak timi kong hna he pehtlai in i ralrin ding ah a kan cawnpiak. Ahohmanh nih minung pakhatkhat cungah a sawhsawh in kan thin a hung bal lai lo. Sihmanhsehlaw kan nun caan lio te chungah hin thinhunnak, rem lonak, pakhat le pakhat huatnak timi hi kan ton cio men lai.

Thinhunnak siseh, rem lonak siseh hitin kan tonmi hna hi kan lung chungin a hung chuakmi le thinlung chungah a ummi an si ko. Minung pakhat kan sinak i kan i ngeih cio mi an si. Ahohmanh nih thinhung peng in um cu kan duh cio lai lo. Midang pakhatkhat thinhun buin le ngaihchiat buin an um peng mi zong kan duh cio lai lo. Dawtnak thinlung,i lawmhnak te hna le theihthiam piaknak, ngaihthiamnak timi kan chung lei in a rak chuak mi (feelings, emotions) te hna zong hi minung aho paoh nih kan i ngeih cio mi an si. Cucu minung kan sinak i kan lungchungah thatnak le chiatnak cawh thup in a um nak kha a langhter mi a si ko.

Nihin cathiang chungin Jesuh Khrih nih a hnu zultu si hna seh, kan nih pakhat cio hna zong zeibantuk thinlung le sining dah kan i thim dingmi a si timi kha a kan cawnpiak duh mi a si. Thatnak maw kan i thim lai, chiatnak dah timi cu kanmah nawl a si ko. Thatnak lam le nunzia kan i thim a si ah cun thatnak kan ton lai; chiatnak kan i thim ah cun chiatnak kan tong ko lai.

Pathian nih minung pakhat sining in a kan ser hnu ah a kan pekmi, a kan ser piak chih mi zeizong vialte hna hi an tha dih ko. Sihmanhsehlaw Pathian nih (freedom of choice) zalong tein i thimnak nawl a kan pekmi cungah zeibantuk nunzia kha dah kan i thim cio hna lai? Thatnak maw chiatnak dah?