Zeikong dah kan ceih tawn?

Act 18:4 “Sabbath fate pumhnak inn ah khan Judah mi he Grik mi he, an lung pemter awkah bia a chimh lengmang hna.”

Dawtmi u le nau hna, Khrihfa kan sinak ah hin nang le kei tah zeibantuk phun in dah kan i pumh tawn ve?

Mithiang Paul cu Sabbath fate pumhnak inn ah Bawipa thawngtha a cawnpiak hna tiin nihin kan rel mi cathiang chungah kan hmuh.

Kan innchungkhar hna chungah hin tah zeibantuk konglam dah a tambik kan chim i kan ceih cio tawn hna.

Kan chan kal ning in siseh, tu lio Covid-19 zawtnak ruangah leng chuah tuk loin mah inn cio ah um dingin ram uk bawi si hna seh, nawl ngeitu hna nawl chuah nak thawngin mah inn cio ah kan um cio hna. Pawngkam thawngpang siseh, ram chung thawngpang siseh, vawlei cunghuap thawngpang siseh theih duh ah mitam pi cu internet kan zoh hna i thil hmaan siseh, bia vakvai siseh chim le ceh cio a si.

Mino tampi nih bawlung kong an ceih, TV in thlah mi zukcawl kong an ceih hna i zanlei or tuzan cu zeibantuk a ra lai tiin ceih cio a si.

A kan sertu le nunnak a kan pe tu Pathian kong zong chim pah hna u sih. Thlacam zong dai thlang hna hlah u sih.

Internet cung hmuh mi konglam lawng chim i midang tthat lo nak kong lawng ceih nak in cun, Bawinu Mary thlacam nak voi (1) te cam zong hi a ttha deuh lai.  Bawipa cawnpiak mi thlacam nak voi (1) kan cam hi kan caah tthathnemhnak a kan pek deuh ko lai. Midang kong ceih sawh, midang tthat lo nak lawng kan chim kan ceih a si ah cun, kan mah le kan mah tthat lonak kan i pek a si ko.

Nihin kan rel mi mithiang Paul hi i zohchunh hna u sih. Amah kut tein rian a ttuan i a paw aa cawm. Cun midang khamh an co ve nak hnga ding caah Jesuh cu Messiah kha a si (Act 18:5) a cawnpiak hna. Taksa him nak lawng siloin thlarau khamh sinak ding zong nihin ruat ti hna u sih. Pathian thawngtha kan chungah khumh hna u sih. Pathian thawngtha kan chungin chuahter tthan ve hna u sih.

Add new comment

5 + 1 =