Zeitindah Bia kan Chim

Photo Credit

“Mifim nih cun fimnak bia an chim i ahmaanmi bia kha an ka in a chuak”. (Psalm 37:30)

Jesuh Khrih nih mizapi kha a auh than hna i, “Nan dihlak in ka bia hi ngai u law hngal tuah u. mi cu lenglei in chunglei ah a lutmi thil nih a thurter lo. A chungin a chuakmi thil tu nih a thurter. Cucaah theihnak hna nan ngeih ahcun thei ko u” (Mark 7:14-16)tiah a ti hna.

Minung cu a ho kan si paoh ah midang that lonak le thangchiatnak bia a chim bal lo le a ruat bal lomi kan um men hna lai lo. Mi hmai ah lang ngai in maw kan chim, asiloah a thli tein dah kan chim timi lawng hi aa dang men lai. Internet chan a si tikah facebook chungah kan hmuh mi kan duh lomi, kan rem lomi hna kha comment chia ngai in kan kan tial kan langhter tawn bal maw?

Solomon cu Pathian nih theih hngalh thiamnak fimnak a pekmi Siangpahrang a si. Sheba siangpahrangnu nih Siangpahrang Solomon a fim ning kha amah hrimhrim nih a hmuh, a theih tikah thangthat loin a um kho lo. Psalm catialtu pa zong nih “Mifim nih cun fimnak bia an chim i ahmaanmi bia kha an ka in a chuak.” (Psalm 37:30) tiah a ti ve. Midang that lonak le an thangchiatnak chim cu hruh ruangah a si.

Fimnak hrampi a si mi Jesuh Khrih nih kan caah a tha hnga dingmi lawng tein a kan cawnpiak. Kan theih kan hngalh khawh hnga dingmi bia lawng in a kan chimhrinh. A chungin a chuakmi thil tu nih a thurter” tiah Bawipa nih a kan cawnpiak. A ding a fel mi Bawipa nih a chimmi bia cu fimnak bia an si i cu fimnak bia cu satan tukforhnak kan tei khawh nak hnga ding caah siseh, zungzal nunnak kan cokhawh hnga ding caah siseh lam a kan hmuhsaktu an si.

Nifatin kan nunnak ah ruahnak thalo, bia chia chim loin; ruahnak tha, biatha, biadik, biading, fimnak bia kan ka chungin a chuah khawh zungzal nak hnga fimnak hrampi a simi Pathian sinah thluachuah hal zungzal hna u sih.

Add new comment

5 + 0 =