Zulh Ding Lam

“Cu bantuk thiamthiam in nannih zong, nan ngeihmi vialte kha nan hlawt dih lo ahcun, ka zultu nan si kho lai lo”(Lk 14:33).

Nihin kan theih mi thawngtha (Lk 14:25-33) kan zoh tikah Khrihfa si ding aa tim mi hna le Khrihfa si a duh mi hna nih hmailei caah ah an ton hnga dingmi vialte hna caah timhcia in um khawh dingin Jesuh Khrih nih “inn satu pa” bianabia in tahchunh nak a kan chimh.

Inn sak aa timmi nih a inn sak nak hnga ding caah ttha tein a chawva i tuaktaan cia ding le inn sak khawhnak hnga ding caah a herh bau mi vialte tling tein a ngeih lawngah a sak khawh lai tiah a ti(Lk 14: 28).

Rian sok a duh mi si hna seh, nu le va thitumh dingin aa tim mi si hna seh rian kong le chungkhar pakhat dirh tikah ton hnga dingmi vialte a hngalh cia ding a si. Cu ve bangin Jesuh Khrih hnu zul Khrihfa si a duh mi hna zong nih harsat zuamhtaik nak in hnga ding mi vialte caah timhcia in um ding a si ve. Catholic Bupi chungah luh a duh mi hna zong nih Catholic hna zumhnak, Pathian biak ning cang hna le Bupi chungah zulh hnga ding mi vialte thieh cia ding a si. Cun Jesuh Khrih nih a zulh mi lam, harsatnak lam, mah duh nak hlawt in Pathian duh ning in nun khawh dingah timhcia in um ding zong a si.

Jesuh hnu zulh a duh mi hna nih cun mah duhnak zulh loin Pathian duhnak kha a nunnak ah a sangbik le a hmasa bik ah chiah ding zong a si. Mah zawn lawng ruah loin midang caah zongah nun ding a si. Zeicah kan ti a si ah cun Khrihfa mi hna nun zia cu “Vailam” he aa lomi harsatnak tampi ton ding a si caah a si.