Zultu si Dirhmun (Lk 14:25-33)

Photo Credit

Tuesday, November 03, 2020

Zei ruangah dah Bawipa Jesuh nih chungkhar siseh, mah le siseh i huat dingin a kan cawnpiak hnga? Bible cathiang nih “i huat ding”a ti tikah a chim duh mi cu “tlawm deuh in dawt ding” a ti duh nak a si.
Jesuh nih a kan cawnpiak tak duh mi cu, zei zong vialte nak in Pathian hi kan nun nak ah lu bik, pakhat nak bik ah chiah ding hi a si. Bawipa Pathian nih minung cu Amah muisam he aa lo in a kan ser i nunnak thaw a kan pek. Kan nunnak ah kan herh mi thluachuah-Vel tling tein a kan pek i a kan dawtnak kha a langhter. Pathian kan dawt cu Amah nih a kan dawtnak a langhter mi kha kan mah hna zong nih a kan daw hmasa tu kan dawt ve nak kan langhter mi a si.
Biatak dawtnak cu kan dawt mi hna sin in zeihmanh i ruahchan lo in dawt hi a si. Zeicahtiah cun dawt mi hna an sithatnak hnga ding caah i pekchanh a si caah asi. Cucu Bawipa nih a nunnak pekchanh tiangin Pa Pathian nawl a ngaih i kan sual nak chungin a kan khamhnak in fiang tein a langhter. Bawipa nih kan sual nak a kan ngaihthiam i a thar mi thlarau nunnak a kan pek hlei ah Pa Pathian he i rem than nak, “Fa” covo a kan pek i “roco tu” dirhmun ah a kan phanhter than.
Mithiang Paul nih: “Nannih cu nanmah ta nan si lo, Pathian ta nan si; a man in cawkmi nan si. Cucaah nan pum cu Pathian sunparnak caah hmang u” tiah (1 Cor 6:919-20) ah a ti. Cu a si caah a ho dah kan dawt hmasat tak tak awk a si? Ruat ve hmanh.
A kan dawtu Pathian hnulei chit in thil dang cungah kan lung a pial sual ah cun siasal a bia mi kan si ko lai. Zeicahtiah cun Pathian he aa ralchan mi a si caah a si.
Dawtmi u le nau hna, Pathian le thil dang cungah thim khawhnak nawl kan ngei cio hna. A ho dah kan i thim hna lai i a ho hnu dah kan zulh lai; nunnak a kan petu maw, siloah thihnak a kan panh ter tu dah?
Thim khawh nak nawl cu na kut cungah a um ko. “Fimnak nih inn cu a sak, hngalhthiamnak nih a fehter; Hngalhnak nih a khaan vialte hna cu a sungmi le aa dawhmi thilri in a khahter. Mifim cu mithawng nakin a thawng deuh, hngalhnak a ngeimi cu thazang a ngeimi nakin a thawng deuh; Zeicahtiah ral cu tha tein khuakhannak thawngin te a si i saupi timhtuahnak theitlai cu teinak a si”(Phungthlukbia 24:3-6).