Zumhawktlak

“Thil hmete ah zumhawktlak a simi cu thil ngan zongah zumhawktlak an si tawn, thil hmete ah a hrokhrawlmi cu thil ngan zongah an hrokhrawl tawn.” (Lk 16:10)

Zumhnak timi hi minung pakhat le pakhat kan i pehtlaihnak ah a biapi tuk mi a si. Mi pakhatkhat cungah zumhnak kan ngeih ti lo a si ah cun an pawngkam in aa hlatnak hmun ah kan i ṭhial ṭheo tawn. Kan zumh lomi hna he aa naih tein um kan duh lo. Zeicah kan ti a si ah cun chiatnak, harsatnak le hnahnawhnak ton kan duh lo caah a si. Ahodah na zumh bik tiah biahalnak um sehlaw aho kan ti hna hnga dah? Aho khi dah kan ruahnak ah a hung chuak hmasat hnga? Pathian ka zumh bik tiah kan ti kho cio hna hnga maw? 

Nihin ni caah Bupi nih ruah ṭi dingin le thazang lak ṭi dingin a kan thimpiakmi Bible cathiang cu Luke 16:9-15 a si. Hi cathiang chungin Bawipa nih “Dawtnak in tuahser nak i ‘Man ngeihnak” (value) kong a kan cawnpiak. Thil hmete hmanh si ko hmanhsehlaw lungthin thiang tein le dawtnak lungthin he kan tuah a si ah cun kan lianngannak le mi sunglawi kan sinak kha kan tuahser nak hna nih an langhter ko lai. Thil hmete cungah a ding felmi hna cu thil lianngan zong zohkhenh dingin ap chinchin an si ko lai. Zohkhenh dingin an ap mi hna cungah zumhawk tlak tein a ummi hna cu mikip nih bochan zungzal mi zong an si ko. 

Mother Teresa nih: “Mikip nih thil lianngan pipi cu kan tuah kho men lai lo. Sihmanhsehlaw thil hmete zong si ko hmanhsehlaw kan tuahmi cungah khan dawtnak lungthin nganpi he tuah khawh a si ko,” tiah a ti. Pathian nih tuah hnga dingin a kan ap mi thil (Matt 25: 14-30) hna kha dawtnak lungthin he zumhawk tlak tein tuah zungzal ding a si ko.