Zumhnak 

Pathian cungah biatak tein zumhnak kan ngeih khawh, kan zumh khawh a si ahcun zeibantuk thil hmanh nih khin a kan dawn kho lai lo, a kan kham kho lai lo. Taksa lei in fahnak a kan pe kho tu hna cung zongah ṭihnak lung thin kan ngei ti lai lo. Zeicahtiah cun Pathian cu zeizong vialte a ti kho tu a si timi zumhnak nih hnangamnak le teinak a kan pek cang caah a si. 

Nihin Missa thawinak chungah kan relmi Bible cathiang hna cu (Hebrew 12:1-4; Mark 5: 21-43) an si i zumhnak kong an si. “Jesuh kha fek tein i zoh chih u sih, amah cungah cun kan zumhnak cu a hramthawk in a dongh tiang a um. Hmailei lunglawmhnak aa ruahchanmi ruangah khan vailam cung i thih ningzahnak cu zeihmanh ah a rel lo i atu cu Pathian bawiṭhutdan orhlei kamah khan a hung ṭhu cang,” tiah Hebrews caṭial tu pa nih a ti (Heb 12:2).

Thawngṭhabia kan relmi chungah thichuahnak in kum hleihnih chung a zaw cang mi nu damnak a hmuh ṭhannak kong zong kan hmuh khawh. Minung sibawi hna sinah a ngeihchiah vialte zong hmang in aa thlop len ko nain a rak dam kho lo. Kum saupi a dam lomi a si cang caah taksa thazang lei in a der ngaingai mi a si lai timi cu a fiang ngai ko. Sihmanhsehlaw amah le amah i zangfah loin, a taksa dernak kha zoh loin dam a duh tuk caah a damter khotu Jesuh kha zumh nak in a fuh, cun a puan kha a tongh tikah a dam taktak timi kha kan hmuh. Minu nih a hmuh mi cu taksa damnak lawng a si lo, Pathian chungkhar ‘fanu’ sinak tiang a zumhnak nih a phakter: “Ka fanu, na zumhnak nih an damter cang. Dai tein va kal law na zawtnak cun va dam ko cang,” tiah Jesuh nih a ti. Dawtmi u le nau hna nang le kei teh kan duh taktak mi hal dingin Jesuh kha Biakinn chungah kan fuh bal ve cang maw, a Thisa kha biatak zumhnak he kan cohlang cang maw?

Cun nihin thawngṭhabia ṭhiamṭhiam ah Jesuh nih a thi cang mi Jairu fanu a thawhter ṭhannak kan hmuh fawn. Jesuh nih Jairu sin ah a chimmi cu, “Na thinphang hlah, a zumh bel zum ko,” tiah a ti. Jairu nih Jesuh cungah zumhnak a ngeih caah a fanu cu thihnak in thawhter ṭhan a si. Hi zawn ah hin theih ding a ummi cu ‘pakhat le pakhat thla kan i campiak nak thawngin midang hna nih damnak (khamhnak) an hmuh khawh’ (James 5:16)timi kha a si. Cuasicaah Pathian kan zumhnak ah hin zeihmanh nih kan dawnkhan hlah seh. Cun minu nih a zumhnak ha a tuahser nak in a langhter bangin kan zumhnak kha kan tuahsernak in langhter ve ding a si (James 2:14-17). Jesuh umnak ah khan va kal ve i va tongh ding a si; a Thisa (Eucharist) kha va cohlaan ding a si.