Zumhnak in Damnak

Nihin ni caah Bupi nih a kan thimpiak mi cathiang cu (Mark 5:21-43) a si i Jesuh nih a dam lomi hna damnak a pek hna nak kong a si. Pumhnak inn uktu a simipa pakhat a min Jairu a simi nih a fanu damnak a hmuh thannak hnga ding caah Jesuh sinah a hal. Jesuh nih a fanu a damter khawh hrimhrim lai timi cu Jairu nih zumhnak a ngeih caah a kal hnawhnak a si. Jairu zumhnak cu Jesuh zong nih a cohlaan ve i Jairu inn ah cun a kal colh ve. Cu lio caan ah cun Jesuh thawngtha phuan mi a ngaitu tampi zong Jesuh hnu ah an zulh i an kal ve.

“Thichuahnak in kum hleihnih a zaw cangmi”(Mk 5: 25) nu nih Jesuh “Mi nih Jesuh kong an chim lengmang cu a rak theih ve i a puan ka tawngh hmanh ah ka dam lai” tiah zumhnak a ngei i “zapi lakah cun hnulei in a ra i Jesuh puan kha a tawngh”. Cu ka hmun le caan te ah cun a thi chuah cu a dam colh. Minu zong nih Jesuh cungah zumhnak a ngeih caah Jesuh nih “Ka fanu, na zumhnak nih an damter cang. Dai tein va kal law na zawtnak cun va dam ko cang” tiah a ti. Minu nih zumhnak in a tongh caah damnak a hmuh than. Minu cu zeitluk in dah aa lawmh hnga!

Jairu sinum pakhat nih “Na fanu cu a thi cang, sayapa cu hnahnawh ti hlah” tiah a chimh tikah Jesuh nih Jairu kha, “Na thinphang hlah, a zumh bel zum ko” tiah a ti. Jesuh nih ngakchianu cu a kut in a tlaih i “Talitha koum” “Ngakcianute, tho, kan ti” tiah a ti tikah ngakchianute cu a tho i aa chawk colh. Zei tlukin dah Jairu innchungkhar hna chungah lunglawmhnak a um hnga i hi bantuk thil khuaruahhar nak konglam a thei mi hna zong nih zei tlukin dah an i lawmh ve hnga.

Kan nih hna zong nih Jesuh sinah zeibantuk damnak dah kan hal cio ve hna lai? Jesuh nih himnak le damnak a kan pek khawh taktak ko, timi hi cungah zumhnak na ngei kho ve cang maw? Jesuh sinah thla kan cam, kan hal mi hmuh loin a kan pek tak mi cu thil phundang zong a si kho. Sihmanhsehlaw a hnu ah cun kan caah a tha ngaimi a si ti kha kan i fiang te ko lai.

Kanmah lei in kan herh takmi cu Jesuh cungah zumhnak kan ngeih zungzal dingmi hi a si. Zeitikhmanh ah lung dongh nak ngeih loin, fel tein thlacam ding le hal ding tu hi kan rian a si ko. Pakhat le pakhat caah thla i campiak hna u sih. Zeibantuk thil hmanh kan cungah tlung ko hmanh sehlaw Jesuh cungah zumhnak ngei zungzal ko hna u sih. Kan duhmi bawmhnak cu Jesuh min lawng ah a um.