Zumhnak he Jesuh hnu zulh

Minung cu aho kan si paoh ah him tein le dai tein um a duh mi lawng te kan si. Ahohmanh hnahnawhnak le ngaihchiatnak ton a duh mi kan um hna lo. Khrihfa mi hna kan nunnak ah hin kanmah minung taksa duhnak lawngin um khawh a si kho hnga maw?

Bupi chungah mithiang (saint) tiah kan ti mi hna le hlaan Khrihfa mi hna sining te kha vun ruah a si ahcun fiang tein theih khawh a si ko. Jesuh hnu ka zul cang lai, Khrihfa ka si cang lai tiah cun mah taksa duhnak lawng kha zulh a si ti lo. Jesuh nih, “Ahohmanh nih zulh nan ka duh ahcun mah zawnruahnak kha nan ngol lai i nifate in nan vailam kha nan i put lai i nan ka zulh lai. Zeicahtiah mah himnak lawng a ruatmi cu a nunnak kha a sung lai sihmanhsehlaw keimah ruangah a nunnak a sung mi cu khamhnak kha a hmu lai,” tiah a ti (Lk 9:23-24). 

Nihin Missa raithawinak chungah kan relmi thangṭhabia thiang cu Mark 4:35-41 chung khan a si i “Jesuh nih thlichia a daihter” nak kong a si. Cu ni zanlei ah cun Jesuh nih a zutu hna kha, “Rili khattelei ral ah khin va kal u sih,” tiah a ti hna i zutu hna cu Jesuh a rak ṭhutnak lawng chungah khan an lut i Jesuh cu an kalpi. Cuka ah cun lawng dang zong kha a um ve(Mk 4:35-36). Jesuh le zultu 12 lawng siloin a dang mi hna zong nih an zulh ve hna ti kha hi kan hmun ah hin hmuh khawh a si. Rili cungah thlichia le tilet a thawh lio ah hin zultu hna lawng rak si loin a dang lawng chung in a rak zultu hna zong an i tel ve tinak a si.  

Jesuh cu a rak um kalnak hmunhma paoh ah khan rak cohlaan a si ko nain a cohlang tu hna sin lawngah hnangam tein um loin hmun dang um midang hna sin zongah kal in “Khamhnak thawngṭhabia” kha a rak phuang tu a si. “Hmundang, kaa dang ah cun hna hnawhnak a ka pe zungzal tu Farasi pawl an um sual lai, a ka cohlang tu hna sin te ah hin dai tein um ko ning” tiah Jesu nih zeitikhmanhah a ti lo. A ral an um a theih ko. Sihmanhsehlaw a raltu hna ngiarnak le ṭhih phoihnak vialte cu a kan dawtnak lungthin nih khan a tei dih cikcek ko. 

Pathian rianthiang kan ṭuannak ah a kan cohlang tu hna sin lawngah daiziar in um loin a kan herh taktu thlarau tampi an um ti kha theih bu tein Jesuh hnu zul zungzal hna u sih. Harsatnak ton caan a um hrimhrim ko lai. Sihmanhsehlaw Jesuh kha philh hna hlah u sih. Zultu hna nih thlichia le tilet ral an ṭih tuk lio caan ah Jesuh nih a bia ka khat in himnak a pek hna bangin kan nih hna zong daihnak le lawmhnak a kan pek hrimhrim ko lai.