Zumhnak he thlacam

Nihin thawngtha bia kan theih mi (John 4:43-54) chung kan zoh tikah Bawipa nih Galilee peng Cana khua ah a tlawn nak kong kan hmuh. Cu khua a phaak tikah Jerusalem khua ah Bawipa nih khuaruahhar nak tampi a tuah mi a rak hmu mi hna nih an rak cohlan. Capernaum khua um ral bawi pakhat nih Bawipa a rak ton i a fapa a zawtnak in a dam than nak hnga caah a rak hal. Bawipa nih a cungah “zumhnak” in a ra mi a si a theih tikah a fapa nih damnak a hmuh than lai tiah a rak ti. Cu pa zong nih cun a zumh ve i a khua lei ah cun a kir than.
Pa nih fapa caah thla a camnak kan hmuh. Nu le pa a si mi hna nih kan fa le hna caah zungzal in thla kan campiak hna awk a si. Pathian cungah zumhnak in thla kan cam tak cio a si ah cun fa le hna cungah zawtnak siseh, thihphan nak siseh, harsatnak siseh Bawipa thawngin teinak an hmuh ve hrim hrim ve ko lai.
Tu lio caan kan ram sining kan zoh tikah fanu/pa, chungkhar le hna cung zongah tihphaan nak nih a kan tlunh cio. Micheu cu thleih khih an tong hna i a cheu cu chungkhar zam tak in khua dang ram dang ah an zam cio cang hna. Cu tikah fanu/pa, chungkhar le hna cungah himnak a um hnga maw tiin lung rethei in um cio a si. Kan rampi caah siseh, chungkhar hna caah siseh, pa le hna nih Bawipa sinah thla fakpi in campiak hna u sih. Pathian cu kan himnak le kan teinak a si bangin kan thlacam nak hna zong a kan ngaih piak hrimhrim ko lai. Kan nih vialte hna zong nih “Zumhnak” in Pathian sin ah thlacam nawl nak tuah zungzal hna u sih.