Zumhnak in kan Hmuh khawh

“Vancung in a rung ttummi nunnak changreu cu keimah hi ka si. Hi changreu a eimi paoh cu zungzal in an nung lai. Ka pekmi hna changreu cu ka sa hi a si, cucu zeicahdah ka pek hna ti ahcun, vawlei hi a nun nakhnga caah a si” tiah a ti.(Jn 6:51)

Thluachuah pekmi Changreu chung le mitsur hang chungah kan Bawipa Jesuh Khrih a um taktak timi cu nihin ni tiang ah kan hmuh khawh mi a si i cucu kan zumhmi zong a si. Changreu chungin Bawipa cu kan sinah caan dongh tiangin a kan umpi ko lai(Matt 28:20). Hi konglam he pehtlai in Khrihfa ka si tiah aa timi hmanh nih zumhawk le cohlaan awk ah a har ngaimi cawnpiak nak a si fawn. Thluacuah pekmi changreu chungah le mitsurhang chungah Bawipa a um taktak ko timi tehte zong bupi chungah tampi in hmuh khawh zong a si.

Hihi ka thi a si tiah a chimmi Jesuh kan Bawipa nih zeitikhmanh ah a kan hleng bal fawn lai lo. Jesuh Khrih a muisam cu hi thluachuah pekmi changreu chungah hin kan hmuh khawh. Ei ruangah a rak thi mi minung hna nih hitin ka ei tthan hna sehlaw nunnak hmu tthan hna seh tiah Bawipa nih aa thimmi lam zong hi Pa Pathian a duh mi khamhnak lam a si fawn.

Minung mit in cun thluachuah pekmi changreu chungah a um mi Jesuh cu kan hmu kho taktak men lai lo. Jesuh nih, “Na ka hmuh caah na ka zumh. Sihmanhsehlaw keimah hmu loin a ka zummi hna caah cun launglawmh awk a va si dah”(Jn 20:29) tiah a kan ti. Nau hlawm tein an tuammi bawhte Jesuh kha tuukhaal hna nih Messiah a si tiah an rak zumh. Minung mithmuh in minung pakhat a si mi Jesuh kha Peter nih “Messiah” tiin tehte a rak khaan ve. Dawtnak le zumhnak fek a rak ngeimi Mary Magdalene zong nih thihnak in a tho tthan mi Jesuh kha zultu hna hlaan in a rak hmuh hmasat khawh.

Kan nih pakhat cio hna zong nih Jesuh chimmi bia kan cohlaan taktak, kan zumh taktak a si ah cun thluachuah pekmi changreu chungah a um mi Jesuh kha kan zumh khawh taktak ve ko lai i kan hmuh khawh taktak ve ko lai.