Zumhnak in Teinak

Minung kan nunnak ah a kan do tu hna le a kan ram lo tu hna hi pungsan phunphun in an um tawn. Minung le minung karlak ah a um kho mi a si bangin minung le thlarau thalo kar lak zongah a um a si kho mi a si.

Nihin ni caah Bupi nih ruah ti ding le thazang lak ti dingin a kan thimpiak mi cathiang hna cu (2 Samuel 15:13-14,30,16:5-13) le (Mark 5:1-20) hna an si. Avoi(1) nak Bible cathiang cu Absalom nih a pa David doh dingin a timh tikah David nih a fapa kut in a zam nak kong a si. “David Siangpahrang cu Bahurim ah a phak tikah, Saul chung a simi innchungkhar chungin mipa pakhat a ra chuak i a min cu Shimei a si, amah cu Gera fapa a si; a chuah pah cun chiat a serh lengmang. “Va lo ko, va lo ko, nang thisen chuah hmangpa, nang zei thahnem lopa!”(2Samuel 16:5,7) tiah a ti hna.

Gospel chung kan zoh than tik zongah Galilee Rili, Gerasa mi hna ram ah Jesuh le a zultu hna an phanh tikah khuavang tha lo ngeimipi nih “Cung Nung Bik Pathian Fapa Jesuh, zeidah na ka duhnak a um: zei kan ti hnga, dan cu ka tat sawh hlah”(Mark 5:7) tiah a ti kan hmuh.

Pathian mi hna cu zei tluk in chiatserh an si zongah tei an si ballo; zeicah kan ti a si ah cun Pathian an sin a um caah a si. “Israel mi cu Absalom leiah an lungthin a tlu cang”(2Samuel 15:13) tiah a ti ko nain Absalom nih a pa David Siangpahrang cu a tei kho hlei lo. Pathian thimmi Siangpahrang a si caah a si. Khuavang nih a tuah mipa zong nih Jesuh le a zultu hna kha a tei kho hlei hna lo. Khuavang nih a tuah mipa tu kha damnak a hmu than.

Kan nih Khrihfa mi hna zong kan nunnak ah tukforhnak a phunphun kan ton khawh. Pathian nih a kan dawtnak le kan cungah a veel thluachuah in a kan umpi zungzal nak hna kha ruat than hna u sihlaw thei thiam hna u sih. “A dongh tiangin a fekmi cu khamh an si lai”(Matt 24:13) tiah a ti bangin Pathian cungah zumh fek tein um zungzal hna u sih. Teinak kan hmu zungzal ko lai.

Khuavang nih a tuah mipa nih damnak a hmuh than tikah Pathian nih a cungah thatnak a tuah mi le khuaruahhar thil a tuah mi vialte kha mikip sinah a thanh bangin kan nih hna zong nih Pathian thawngthabia kha mikip sinah thanh cio hna u sih; Pathian thawngthabia kha i nunpi cio hna u sih.