Zumhnak in Teinak

Tlang cungah Jesuh Khrih a muihmai aa thlennak kha zultu Peter, James le Johan hna nih khuaruahhar ngai in an hmuhnak kong kha nihin Missa raithawinak chungah kan relmi (Mk 9:2-13) thawngṭhabia thiang a si. Jesuh Khrih cu zultu hna mit hmuh bak ah a muihmai aa thleng. Cun  Moses le Elijah hna zong Jesuh he bia an i ruah ko kha zultu hna nih cun an hmuh fawn hna. Cun Pa Pathian awthawng zong an theih fawn: “Hihi ka dawtmi ka Fapa a si, a bia kha ngai u”(Mk 9:7). Peter le a hawi le hna nih hi bantuk khuaruahhar thil an hmuh tikah an thin a phang i an lau ngaingai ko. Sihmanhsehlaw Jesuh an pawng te ah a um caah an hna a ngam kho ṭhan zungzal ko. Jesuh an sin a um caah an ṭihnak le an thinphannak vialte an lo dih. 

Jesuh sinah kan kal, Jesuh he hmunkhat te ah kan um ve a si ah cun kan thinphaan thlalau nak vialte an lo dih ve ko lai. Pawngkam ah hnahnawhnak petu an tamtuk caah zeizong vialte teitu Jesuh Khrih kha kan panh zungzal a herh. Amah bawmhnak kan herh zungzal ko.

Avoikhat nak Bible thiang kan relmi cu Hebrew 11:1-7 chung in a si i zumhnak kong a si. “Zumhnak ngeih kan ti hi, kan i ruahchanmi kan hmuh ṭheo lai ti kan zumh le a taktak le a ngaingai a simi thil kan mit in kan hmuh khawh lomi hi an um ko ti kan zumh hi a si. Zumhnak an rak ngeih caah hlanlio mi hna nih khan Pathian cu a lung an rak ton” (Heb 11:1-2). Pathian lungthin ton duh a si ve ah cun amah Pathian cungah zumhnak fek taktak kan ngeih a herh ve. 

Kan nunnak ah hin Jesuh Khrih kan sinah a um zungzal ko timi zumhnak kan ngeih a herh. Cun kanmah hrimhrim zong Amah sinah kan kal, kan panh a herh ve. Jesuh Khrih nih zumhnak ngeih ding in a kan forhfial mi cu, “Nannih nih anṭam ci ngaw zumhnak nan ngeih ahcun, hi thingtheihmung kung hi, ‘Na hram in i phawi law rili ah khin vaa phun,’ nan ti ah nan nawl an ngaih ko hna lai,”tiah a ti(Lk 17:6). Zumhnak hmual a lianh ning le a ṭhawn ning kha Jesuh nih a kan cawnpiak duh mi cu a si.

Jesuh kan sin a um a si ahcun daihnak kan hmu zungzal ko lai. Harsatnak kan ton caan zongah Jesuh cungah zumhnak kan ngeih mi nih khan teinak a kan pek zungzal ko lai.