Zumhnak theipar

"Hi changreu a eimi paoh cu zungzal in an nung lai"(Jn 6:51).
Dawtmi u le nau hna nihin kan theih mi thawngtha bia chungah kan Bawipa Jesuh Khrih nih zumhnak kong a kan cawnpiak. Zumhnak timi cu chim cu a fawi ngai mi a si. Sihmanhsehlaw, biatak tein tuah le nunpi hi a har ngai mi a si. Zeicah kan ti a si ah cun kan nih minung hna hi thazang a der mi kan si hna caah a si.
Kan umnak pawngkam kan zoh tik zong ah siseh pakhat le pakhat cungah zumhtlak in kan um khawh lo a si ah cun riantuan ti ding hi a har ngai i a dih tiang zong tuan ti khawh a si kho lo. Innchungkhar hna cungah siseh, hawikom hna cungah siseh, hruaitu le hnu zultu hna chung zongah siseh kut tlaih ti ding le rian tuan ti ding hi a har mi a si. Rian tuan ti khawh lo a si ah cun tei nak zong hmuh khawh a si fawn lo.
Ca ve bangin Pathian le minung kar ah zumhtlak dirhmun a um lo a si ah cun thluachuah zong a um kho lai lo i Khamhnak zong co khawh a si lai lo. Nihin nang le kei zong Bawipa nih a cungah zumhawk tlak dirhmun in nun ding le a cawnpiak mi vialte hna cungah zumhnak he zulh dingin a kan sawm. Bawipa Thi le Sa cu kan nunnak a si i, Bawipa Thisa a cohlang mi vialte hna zong nih nifatin an nunnak ah theipar tha an tlai zungzal kho. Bawipa duh mi nunzia le theipar dawh a tlai kho zungzal mi kan si cio khawh nak hnga Pathian sinah veel thluachuah hal zungzal hna u sih.