Zumhnak in Thlacam

Nihin Missa raithawinak chungah kan relmi thawngṭhabia thiang (Mark 7:24-30) chungah hintin kan hmuh: “Cun cuka cun Jesuh cu a chuak i Tair peng ah khan a kal. Inn pakhat chungah a lut i ahohmanh nih ka um hi hngal hna hlah seh ti a duh, sihmanhsehlaw aa thup kho lo”(Mk 7:24).

Jesuh cu thawngṭha bia a rak phuan lio ah hin manh lo ngai in mi hna kha a rak cawnpiak hna, cun an zawtnak in a damter hna, khuavang nih a tuah mi hna zong kha a chuah piak hna i a damter ṭhan hna. Hitin manh lo ngai in Jesuh nih a rak cawnpiak lengmang hna caah a minung sining in cun a rak ba taktak ko lai. Dinh zong a duh taktak ko lai. Hi sining te he pehtlai in nihin kan relmi cathiang nih fiang tein a langhter. “Ahohmanh nih ka um hi hngal hna hlah seh ti a duh” tiah a timi hi phung dang in kan chim a si ah cun “Jesuh cu dai tein dinh a duh” tinak a si ko. 

Sihmanhsehlaw miphun dang a si minu, “uico” he tahchunh mi miphun dang Greek minu pakhat, a fanu khuavang nih a tuahmi nih khan Jesuh umnak hmun a theih tikah ahohmanh ṭihnak thinlung ngei kho ti loin Jesuh sin ah direct in a kal i a fanu dam ṭhan nak hnga ding caah Jesuh sinah a va hal. Hi zawn ah hin, Jesuh Khrih a thin a hung timi kan hmu lo. A ing a puang timi zong kan hmu lo. Miphun dang a si ko nain, Judah mi hna nih uico tlukin ruahmi miphun chungin a si ko nain Jesuh nih cun a bawmh ṭhiamṭhiam ko. Thleidannak lungthin a ngei lo. Hi zawnah ruah ding a hung um mi cu, Khrihfa hruaitu hna le Pathian rianṭuan tu hna nih Jesuh thil tuah mi te hi philh lo hrimhrim ding a si. Jesuh nih a mission a philh lo bangin Pathian rianṭuan tu hna zong nih an mission te kha philh lo ding a si.

Jesuh nih minu a zumhnak le a cungah zeitlukindah aa bochan timi mi kha a hmuh tikah, “Na inn ah va ṭin ko, na fanu chungin khuachia kha a chuak cang,” tiah a ti (Mk 7:29). Kannih hna zong Jesuh sinah zeibantuk khuachia hna kha dah kan chungin kan chuahpiak ko tiah kan ti ve hna hnga? Minu bangin lungsau tein le tangdornak lungthin he Jesuh sin ah kan herh tak mi hna kha kan hal a si ah cun pek kan si ve ko lai.