Zumhnak in Zulh

Nihin kan rel mi thawngthabia (Matthai 12:14-21) chung kan zoh tikah Farasi mi hna nih “Jesuh thah khawhnak ding khua an khaan nak kong” a si kha kan hmuh khawh. Zeicah kan ti a si ah cun Farasi mi hna nak in Jesuh Khrih cungah mipi nih zumhnak an ngeih deuh caah a si. Jesuh nih Farasi mi hna tinh mi zeidah a si ti a theih tikah “cuka hmun cun lo diam in a kal i mi tampi nih an zulh. A zawmi vialte kha a damter hna i amah kong kha midang nan chim hna lai lo, tiah a thlauh hna.” Jesuh hnu a zultu mi tampi an si a ti. Mi tampi a ti tikah mirum, sifak, mifim, mihruat tiah ruah mi hna zong tampi an i tel lai. Mi nung cawhthup in an um ti duhnak a si.

Jesuh hnu zulhnak ah thleidannak a um lo. Amah kha a zum tak i biatak zumhnak he a zul mi vialte hna kha an zumh ning cio in Jesuh nih an caah thatnak thlua a chuah ko hna. “A zawmi vialte kha a damter hna,” tiah a ti tikah minung kan nunnak ah hin dam lonak kan ngei cio ve hna. Jesuh sin ah zumhnak he kan kal ve, kan panh ve cio a si ah cun damnak a kan pek cio ko lai. Taksa lei in maw, asiloah thlarau lei in maw damnak a kan pek ko lai.

Pathian nih Isaiah kaa in a phuanmi (Isaiah 42:1-4) a tlinnak hnga dingmi zong Jesuh nih a hnu zultu mipi sinah a chimh fawn hna. “Hika i a ummi hi ka “thimmi” ka sal a si. Ka dawt i a cung i ka lung a tlingmi a si,” tiah a ti. “Amah cungah cun ka Thlarau kha ka chiah lai i miphun vialte hna sinah ka biading kha a thanh hna lai,” tiah a ti rih. Miphun vialte hna sinah a thimmi a sal nih dinnak le luatnak thawngthabia a phuan lai tiah a ti. Cu Thawngthabia cu minung vialte nih kan lungchung in kan kawl cio mi, hmuh le cohlaan kan duh cio mi Thawngthabia a si.

Kan nih hna zong miphun vialte timi chungah telhmi kan si cio ve hna. Jesuh Thawngthabia kan theihmi “dinnak le luatnak” thawngthabia kha midang hna sinah kan phuan cio ve ding a si. Jesuh cu Pa Pathian he aa pehtlaih zungzal bantukin kan nih hna zong thawngthabia kan phuannak ah Jesuh he thlacamnak in siseh pehtlaihnak kan ngeih zungzal a herh.

Kan nih hna zong Pathian thimmi “Sal” kan si cio hna. Pathian dawtmi zong kan si cio hna i Pathian lung a tlinhmi zong kan si cio hna. Kan vawlei pi nih Jesuh Khrih dawtnak le a thawngthabia rawltam tihal bantukin a herh tuk hringhran ko. Kan tuah khawh cio ve mi cu Jesuh cawnpiakmi hna kha kan nunnak in langhter hi a si. Jesuh cawnpiakmi kha i nunpi dingin kan i thim cio hna lai maw?