Zumhtlak dirhmun

Kan lai phungah pa a simi hna nih nupi tthit an i timh tikah kawi an i tleih, an i ngeih hna i cu an kawi hna he cun an nun dih tiang pehtlaihnak an ngeih tawn hna. Ngaihchiat caan ah siseh, lunglawmh caan ah siseh, harsat caan ah siseh, sitthat caan ah siseh zumhtlak dirhmun in pakhat le pakhat an i um pi hna i an i dirpi cio tawn hna.

Nu le va ah aa tthi um mi hna zong nih chiat caan ah siseh, tthat caan ah siseh pakhat le pakhat an nun dih tiang in i ttanpi ding le i um ding in mipi hmai ah le Pathian hmai ah biakamnak tuah a si. Pakhat khat nih zumhtlak dirhmun in a um lo (titsa a ngeih lo) a si ah cun chungkhar cungah buaibainak a chuak tawn i chungkhar an ser an dirhmi zong a rawk kho tawn.

Pathian rian a ttuan mi hna Siangbawi te hna le Sisters te zong nih an biakamnak an buar (titsa an ngeih lo) a si ah cun an rianttuan nak ah khua awng an tong kho ve lo i tlaknak lei lawng ah an panh tawn ve. Zeicah tiah cun bupi cungah siseh, Pathian cungah zumhtlak nun in an nun khawh lo ruangah a si.

Siangbawi te hna le Sister te hna hi anmah lawng in zeitik hmanh ah an um ballo, an si ballo. Jesuh Khrih he a um ttimi, bia aa kam ttimi an si caah Jesuh Khrih he a um tti a kal ttimi an si.
Zumhtlak dirhmun silo (titsa ngeih lo) cu rawhral nak le buaibainak a chuahter tu a si caah, pakhat cio kan nunnak kan dirhmun cio ah hin zumhtlak sining dirhmun in dir khawh cio i zuam hna u sih. Pathian sin zongah thazaang thluachuah hal zungzal hna u sih.