Zungzal a kan Dawtu

Pope Francis nih, “Minung hna cu Pathian loin an um kho nain Pathian belte cu minung hna loin a um thiam lo. Zeicah tiah Amah cu Dawtnak a si i a sermi minung hna cungah dawt loin a um khawh lo caah a si,” tiah a ti. Johan 3:16 “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai,” tiah a ti.

Jesuh nih Nicodemus bia a ruah lio ah Pathian dawtnak kong kha fiang tein a chimh. Hlaan Israel mi hna nih Pathian phungbia an buar tikah meirul nih a cuk hna i mi tampi an rak thi. Cutikah mi hna nih Moses sinah an fuh than i, “Bawipa le nangmah kha kan in mawhchiat hna caah kan sual cang; kannih sinin rul kha a lak hna nak hnga, Bawipa sinah thlacam tuah” tiah an ti tikah Bawipa nih Moses kha, “ Meirul pakhat in ser law, tung cungah tar tuah; rul cukmi paoh nih an zoh tikah an nung lai,” tiah a ti i dar rul a zoh mi paoh cu an dam than i an nung hna timi kong (Number 21:4-9) chungah kan hmuh.

Jesuh nih, “Moses nih dar rul kha thetse ram lakah a tar bantuk khan Mi Fapa zong hi tar a si ve lai. Cucaah cun amah a zummi paoh nih zungzal nunnak an ngei lai. Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai,” (Jn 3:14-16) tiah a ti.

Pathian cu kan sual nak kha zoh peng loin a dawtnak he a kan khamh than zungzal tu a si caah kan tlau thai ding kha a duh lo. Tuu tlau kong siseh (Luke 15: 1-7), Tangka tlau kong siseh (8-10), Fapa tlau kong siseh (11-32) Luke thawngthabia chungin Pathian dawtnak kong fiang tein kan hmuh khawh.

Pathian nih minung hna a kan dawtnak a langhternak, vailam cungah an tarmi Jesuh kha zoh in a kan dawtu Pathian sinah kir tthan hna u sih.