Zungzal a kan umpi tu Bawipa (Matt 28:20)

Bawipa cu zungzal in a kan um pi tu a si (Matt 20:20). Bawipa nih mithiang Paul zong a rak um pi zungzal caah a tuahsernak le a chim relnak hna paoh ah khua awnnak a rak hmu. Harsat nak caan ah siseh, lunglawmh caan ah siseh Bawipa nih a hnu zultu hna sinah hin a kan um pi zungzal ko ti hi theih hna u sih.Isaiah chungah kan hmuh mi cu: "Ti thuk na tan tikah na sinah ka um lai, harnak na inmi nih an tei lai lo. Mei alh na tan tikah an kangh lai lo, harnak na inmi nih an hliam lai lo" tiah a ti (Isaiah 43:2). Mithiang Paul zong biaceihnak hmun ah um ko hmanhsehlaw Bawipa nih a dir pi i: "Na lung tthul hlah. Jerusalem khua ah keimah tehte na sinak kha na chim cang, cu bantuk thiamthiam in Rom khua zongah na tuah hrimhrim lai" tiah a ti(Acts 23:11).

Nang lei kei zong harnak kan in mi nih kan tei hlahseh. Bawipa cu kan pawngah a kan dir pi zungzal ko timi hi thei hna u sih. Bawipa sinah bochannak lungthin he naih zungzal hna u sih. Zeicah kan ti si ah cu Bawipa dah ti lo cu a kan khamh kho tu ding le teinak a kan pe kho tu ding in an um lo caah a si. Psalm catial tu pa nih: "Nangmah da ti lo cu ka ngeihmi dang zeihmanh a um lo, maw Bawipa, ka herhmi vialte cu nanmah nih na ka pek, ka nunnak cu na kut chungah a um" (Psalm 16:5) tiah a ti bangin Bawipa zoh bu in le bochan bu in hmai kan kal a si ah cun teinak kan hmuh hrimhrim ko hna lai.