Zungzal nunnak biakamh mi kan si

“Ka tuu nih cun ka awk kha an ngaih, annih kha ka hngalh hna i an ka zulh. Annih cu zungzal nunnak kha ka pek hna I an thi ball ai lo; cun ahohmanh nih annih cu an ka chut kho fawn lai lo.” (Jn 10:27-28)

Kan nih hna nih Jesuh Khrih kong kan theih i a cungah zumhnak kan ngeih mi hi Pathian veel le thluachuah thawngin a si; amah ta ka si hna i amah tuurun chungah cohlaan mi kan si. A caan ah cun vawlei thil sining hna nih harsatnak a kan pek caan a um ko lai. Cun lungdong in a ummi zong an um kho men; mah le mah nunnak tiangin aa liamter mi hna zong an um kho men lai.

Harsatnak le ngaihchiatnak hna ton a si tikah nang teh aho khi dah na panh ve tawn? Ngakchia pakhat leng a chuak i a khawn sual tikah aa bochanmi a nu maw a pa maw a panh tawn hna i a cungah thil a cang mi kha a chim theo tawn. Nu tling pa tling a si cang mi kan nih hna nih teh harsatnak le ngaihchiatnak kan ton tikah aho khi dah kan panh i kan sining kan chimh tawn? Ruat than cio hna u sih.

Vawlei cung sining harsatnak hna ruangah ngaihchia lileng in na um lio ah na pawngah an umpi zungzal tu cu Jesuh a si kha theih ko. Zeicah tiah cun kannih hna cu Jesuh hnu zul (tuu) kan si caah amah sinin ahohmanh nih chuh khawh lomi kan si (Jn 10:28). A aw kha na ngaih i a kan hruainak lam ah kan kal a si ah cun kan tlau kho thai lai lo. Dawtnak he a kan auhnak aw thawng kha tha tein ngaih i a sin panh than ding philh hna hlah u sih. A kan kawl i a kan hngah zungzal ko (Lk 15).