Pathian he Chuncaw dumtti

Hngakchia pate cu Pathian hmuh le tawn a duhtuk caah a thil zuun hnih le changreu tlawmpal a zaal chungah a khumh i khual tlawn aa thawh. Saunawn a hun kal ah khin a battuk caah lamkam a ummi pangpar dum pakhat ah a `hu i changreu aa phorh mi kha a chuah i ei aa tim. Cu lio i a pawngkam i paw`am le ngeihchia ngai mi a `hu ve mi tarnu a hei hmuh caah a changreu cu tlawmpal a cheuh bang. Tarnu nih cun hngakchia pate cu mirh buin a hun zoh i lung lawm le thanuam ngai in changreu cu a lak. A mirh mi Tarnu mithmai cu zoh aa dawhtuk caah hngakchia pate nih zoh lengmang khi a duh. Caan tlawmpal ah a dang tlawmpal a cheuh `han. Cuti a cheuh an ei pah bu khin an i zoh veve i lunghmuih tak in an mirh `i. Hngakchia pate cu aa lawm tuk i chun nitlak zeibia kaakhat hmanh an chim lo nain changreu an ei pah khin an pahnih cun an mirh `han.

Khua a muih deng cang caah hngakchia pate cu a tho i inn lei kir dingah kar a hun hlan. Karnga hrawng a hun kal ah khin a hnulei a hur kir `han i tarnu cu akuh. Tarnu zong nih cun dawh tak in a mirh ve i hngakchia pate cu a biang ah a hnamh. Inn a phak i kutka a vun awn bak in a nu nih a fapa mithmai a panh ning le aa nuamhning a hmuh tikah a khuaruah a har ngai i “Zei ko nih dah mah tluk in na lung an hmuih i an lawmh ter” tiah a hal. A fapa te nih cun “Ka nu, Pathian he chuncaw kan ei `i” tiah a leh. A nu nih bia hal chap aa timh lioah a fapa nih a timi cu “Ka hmuh mi vialte lakah a mirh ah aa dawh bik bak a si” a ti. 

Cu lioah cun tarnu te zong cu inn ah lunghmuih ngai in a rak `in ve i a fapa nih a nu lungnuam le hnangam tuk in a `in a hmuh cu a khuaruahhar tuk ve i “Ka nu zei ko nih dah mah tluk in na lung an lawmhter” tiah a hal. Anu nih “Ka fa, Pathian he pangpar dum ah chuncaw kan i hrawm. Ka ruahnak leng in Pathian hi a rak hngakchia ngai” tiah a leh. 

Mi tam nawn nih hin tawngh, mirh, biathlum bianem chim, mi bia`ha tein ngeih piak, mi `hatnak kaakhat chim le mi cungah zawn ruah nak va langhter hna i a `hawnnak nih khin mi dang nunnak a thlen khawh hi kan philh `heu tawn. Kan hngalh awk a si mi cu Pathian hi zei bantuk muisam a ken hngalh khawh a si lo. Aho minung paohpaoh kan nunnak ah kan hmuh kan ton mi hna hi a ruang a um peng. Pathian muisam keng mi an si ti ruahnak he chawnh biak dih hna ding an si. Nangmah an in chawnh biaknak le anin zohnak in na chungah um mi Pathian kha hmu kho hna seh