Anglican in Catholic Leiah

Anglican Bishop minthing pakhat Catholic Bu ah a lut

October 14, 2021

Canterbury Archbishop siawk tiangin ruahmi Anglican Bishop minthang pakhat, Rev. Michael Nazir-All (Anglican Bishop in aa dincang mi) cu Catholic Bu ah a lut cang. Rev. Michael Nazir-All cu England ram, Rochester khuapi i Bishop pakhat a rak sibal i atu ahcun Personal Ordinariate of Our Lady of Walsingham timi phukomh chungah a lut cang tiah The Spectator Magazine nih October 14 ah a tarlangh.

Personal Ordinariate of Our Lady of Walsingham timi phukomh cu 2011, January 15 ah Pope Benedict XVI nih England ram le Wales ram i ummi Anglican bu chung i Bishop le Siangbawi ttuancia pawl he finkhawm in an rak dirhmi phukomh pakhat asi. Hi Catholci phukomh pakhat chungah Anglican bu chungin an rak ngahmi rosung hna hlawtdih herhlo te’n an kalpi kho.

The Spector Magazine I a tarlanghnak ahcun, Ordinariate phu chungah Rev. Michael Nazir-All cu, cu phu i lubik a simi, Msgr, Keith Newton nih September 29 (St. Michael le Vancungmi pawl conglawmhnak ni) ah a rak cohlang ti asi. Cun, Pope i nawl peknak he Ordinariate phu chungah Catholic Siangbawi cannak zong a phungning bantukin pekchih a si lai.

Rev. Michael Nazir-All nihcun, “Anglican pakhat i Lamkaltu pawl, zumhnak hruaitu pupa pawl le Council i cawnpiak mi bantukin zulh duhnak lungthin hi, hi Ordinariate phu chungah fektein zohkhenh khawh asilai ti zumhnak ka ngeih” tiah a chim. Cupinah, hi phu chungah Catholic cawnpiaknak he aa kalhlo mi Anglican rosung pawl zohkhenh khawh asilai timi zongnih thazaang a ka ngahter ti zong in a rak chim.

Kan hnu thla chungah Ebbsfleet khua i Anglican Bishop a ttuanbaltu Rev. Jonathan Goodall zong Catholic bupi chungah a lut vecang. Anih zong cu, caan saupi thlacamnak a ngeih hnuah Catholci Bu chungah luh dingin a sungphiat mi asi ti kong zong kha a chim.

Rev. Michael Nazir-All cu 1949 kum ah, Pakistan ram, Karachi khua ah a chuak i Catholic Sianginn ah fimcawngtu zong asi. Anih hi Khrihfa le Muslim cawhmi background in a chuakmi a si i, British le Pakistan rammi sinak ngeimi zong a si.

1994 kum ah, Rochester i Bishop dirhmun in `tuanvo pek asi. Fate pahnih ngeimi chungkhar zong asi. 1999 kum in Britain’s upper house of Parliament tiin auhmi, House of Lords i chungtel pakhat diirhmun in `tuanvo a ngei ve.

Amah cu Anglican le Roman Catholic phukomh i rian`tuannak zongah a tel`theu mi bochanh awktlak pakhat zong a si. Cun 2002 kum ah UK media nih Canterbury i Archbishop, George Carey rian changtu hna lak in uar umbik mi pakhat zong asi ve tiin an rak tarlang bal.

Atu ahcun Oxford Centre for Training, Research, Advocacy, and Dialogue (OXTRAD) timi phukomh hruaitu dirhmun in rian a `tuan cuahmahtu asi.

Rev. Michael Nazir-Ali he pehpar in Msgr, Keith Newton nih, “anih hi 2011 kum i Ordinariate phukomh dir thok in UK chungah hi phukomh `thanchonak a duhtuk mi asi. Ordinariate of Our Lady chungtel pawl kan dihlak in, Catholic Bupi chung i a luhnak le a rauhlan i Catholic Bupi chungah Tlangbawi Orination a ngah hnga dingmi cungah kan lung a lawm cio” tiah a rak chim.

Ordinariate phukomh chungtel Siangbawi pakhat a simi, Fr. James Bradley nih kan hnu thla i a tarlanghmi ban asi ahcun 1992 in tuni tiangah Catholic Bupi chung i an lutmi Anglican Bishop pawl cu a tanglei bantuk an si.

Graham Leonard (London); Conrad Meyer; John Klyberg (Fulham); Richard Rutt (Leicester); John Broadhurst (Fulham); Edwin Barnes (Richborough); Keith Newton (Richborough); Andrew Burnham (Ebbsfleet); David Silk; Paul Richardson; John Goddard (Burnley); le Jonathan Goodall (Ebbsfleet).

Rev. Michael Nazir-Ali nih a chimmi cu “Pakistan i ummi bupi chungah siseh, Mdiddle East ah siseh, England i ummi bupi chungah siseh, Wider Anglican Communion chungah siseh, Pathian rian ka `tuanmi hi a sunglawituk. Atu `tum i thil a cangmi hi, kan i hrawmmi kan Bawipa le a miphun hna rianhnak ah hmailei ah ke ka karbeh mi pakhat asi tiin ka hmuh. Atubak ahcun, bu tinkip caah thla ka cam zungzal bantukin keimah ca zongah thla nan ka campiak ve dingah nawl kan duh” a ti.

Bawipa le a mi hna caah riantu tha an si khawh zungzalnak hna caah thla za cam zungzal hna u sih.

Hram: CNA