Mithiang Stephen

ST. STEPHEN  (+36)

(HMASABIK MARTAR)

            Hmasabik martyr a simi St. Stephen cu hmasabik Bupi chung i min lang deuhmi Deacon pasarih chungah aa telve mi a si. Pathian `thawnnak in a khat i mi zapi hmaiah khuaruahhar nganpi hna a rak tuah. Fimthiamnak he a tling i lungthin thiangin a chim mi bia cu ahohmanh nih saupi an celh kho lo. Cubantuk `thawnnak ruangah Judah mi hna nih an nahchuah, an thin a khenh hna i Stephen kha ningzah thleih dingah biaceih zungah an chuahpi. Asinain Stephen a mithmai cu Vancungmi bantukin a tleu i “Nannih cu nan pupa hna bantukin Thiang Thlarau kha nan doh zungzal; Profet hna i sersat hremnak a ing lomi nan pupa an um bal maw?” tiah a dir i a ti hna.

            Cubia a theimi biaceihtu chungtel hna cu an thin a hung i a cungah lung tlingloin an hacaang rial tiang in a tuah hna. Asinain Thiang Thlarau he a khatmi Stephen cu Vancung khi a zoh i, “Zohhmanh, Vancung innka aa hun i mi Fapa cu Pathian orhlei kam in a `thut kha ka hmuh,” tiah a hmuhmi langhnak kha a chim. Stephen hmuhmi kha annih nih an hmuh ve lo tikah an thin a hungtuk i Stephen kha khualeng ah an hruai hnuah lung in chehhram an thawk. Stephen nih, “Pathian sinah Jesuh … Ka Thlarau kha rak ka lakpiak ko Bawipa,” tiah a hal. Cun a khuk aa bil i aw thangpiin “Bawipa Pathian,… hi mi hna an sualnak hi i cinken piak hna hlah,” tiah chiatserh in a chim buin a thi (Lam; 7:59).