Thlacampiak hna u sih!

Jesuh Khrih nih: “Hihi philh hlah u: nan sinah a zungzal in, caan dongh tiangin ka um lai” (Matt 28:20) tiah a ti bangin nihin ni tiangin kan sinah muisam a phunphun in a kan um pi taktak ko. A kan um pi ning vialte lakah a lang khun in a kan um pi ning cu “A Thisa”(Eucharist) in a si.

Khrihfa kan hun si hnu ah kan ngakchiat lio caan tein kan nu/pa hna he Biakinn ah kan kal tti tawn hna. Pathian bia kan hung cawng hna i kan dih hnu ah “Bawipa Thisa” kan cohlang hna. Mah ni thawk in kan dam ko le caan ttha kan ngeih ko hna a si ah cun zarh fatin biakinn kal in kan i pum hna i Bawipa Thisa cohlannak kan ngei. Thlacamnak vialte lakah hmual a ngeibik mi Missa raithawinak ah kan i tel hna i a nung mi hna caah siseh, a thicia mi thlarau hna caah siseh thlacampiak nak kan ngei.

Bupi chung ah mithiang hna kan ti mi hna hi an nun lio caan ah Missa raithawinak ah aa tel i Bawipa Thisa a cohlang mi le a bia zungzal mi hna an si.

“Rethei le thilrit mi vialte hna, ka sinah ra tuah u, dinhnak kan pek hna lai”(Matt 11:28).

Minung hna nih hin harsatnak le retheihnak kan ton caan paoh ah Pathian sinah thla kan cam tawn. Kan sinah a Thisa in a kan um pi mi “Jesuh” sinah kal in thla kan cam tawn. “Ka sinah ra u” tiah a kan sawmtu Pathian kan Pa sinah, fale a simi hna nih kan kal zungzal phung a si.

A thicia mi hna zong nih an nun lio caan ah Bawipa Thisa sinah kal in thla an rak cam, thazang an rak i lak bangin an thih hnu zongah a nung mi hna sin in thlacampiak ding le Missa raithawinak a kan tuah piak lai timi ruahchannak he thlacampiak ding in a kan hngah ko hna.

An thlarau Pa Pathian sin a phanh khawh zau nak hnga, thlacamnak ah hmual a ngeibik mi thlacamnak a si mi “Missa raithawinak” in thlacampiak hna u sih.