Manager Kan Si

“Cu thil zohkhenhtu mihrokhawlpa cu a bawipa nih khan cu bantukin fim ngain thil a ti caah a thangtthat; zeicahtiah hi vawlei cung mi hna hi an thil tining ah ceunak mi hna nakin an fim deuh”. (Lk 16:8)

Rian kan ttuannak in siseh, kan thazang kan thluak hmangin kan hmuh mi thilri chawva hna khi “Kan mah ta, keimah ta” tiah kan ti tawn. Sihmahsehlaw thlarau lei kap in kan zoh tikah kan tuahsernak thawngin kan hmuh mi thilri, chawva hna khi kanmah ta taktak an si lo. “Asi ahcun ho ta dah an si” tiah kan ti ko men lai. Biatak tein kan ruah a si ah cun sertu Pathian ta lawng te an si. Amah lawng hi thilri ngeitu le a kan petu a si. “Keimah thazang hmangin kan ttuanhawl mi a si mi paoh cu ka ta a si” tiah na ti men lai. A si ah cun minung hi teh aho ta dah kan si, aho sin in a ra mi hna dah kan si i hi vawlei kan nun a dih tikah aho sin ah dah kan kal (kir) tthan te lai?

Rian cu biatak tein kan ttuan tak ko hna, kan hmuh mi tangka hna in thilri le chawva cu kan i cawk ko hna. Sihmahsehlaw Bible mit (thlarau mit) in kan zoh tthan a si ah cun: “Pathian pek a si lomi na ngeihmi zeital a um maw? Cucaah cun nan hmuhmi cu a lakin hei hmu hlah u law cu bang, zeitindah nan i porhlawt khaw?” tiin(1Cor 4:7) kan hmuh khawh. Aho nih dah kan dum, kan lo, kan ram chungah ruah ti hna le thlizil thiang hna hi a kan pek; aho nih dah kan cinthlak mi thlici hna hi a kheuhter? Lamkaltu chungah kan hmuh mi cu: “Pathian cu minung kha nunnak le thaw le zeizong vialte a petu a si caah minung nih an tuahpiak khawhmi kha a herhmi pakhat hmanh a um lo”(Lamkaltu 17:25) tiah a ti. Kan sinah a um mi chawva hna le nunnak hna hi Pathian nih a kan pek mi lawng te an si.

Kan nih minung hna cu Pathian thliri a zohkhenh tu lawng kan si. Kan sinah a um mi vialte hna cu Pathian thilri lawng te an si. Kan thilri a si lomi hna cu a zohkhenh zong kan herh lo ti ding a si lo. A kan zohkhenhter mi hna kha ttha tein kan zohkhenh lo a si ah cun, kan hman lo a si ah cun, kan hrawh sual a si ah cun kan liam tthan sual lai. Cu caah Bible nih “zeizong vialte a petu” a kan petu tiah a ti nak hi a si cu.

Thliri le chawva a ngeitu pa nih cun a thliri ngeih mi vialte cu a duh paoh in a tuah khawh ko. Manager pakhat sinah a ap ta a si ah cun cu manager pa nih thilri hna a kilkawi ning hna le a tuah to ning cazin vialte kha thilri ngeitu pa sinah ttha tein fianternak a tuah peng a herh. Ttha tein zohkhenh loin a duhduh in a nawnnok a si ah cun a liam ko lai (or) dantat a si ko lai.

Zeitin dah Pathian chawva hna cu kan zohkhenh hna lai? Pathian duh ning phunglam ning tein zohkhenh ding a si ko. Pathian duh ning kan ti tikah kanmah duh ning kha pakhat hmanh telhter lo ding a si. Pathian “Agenda le program” ning in tuah ding le kal ding a si ko. Si ah cun chawva zohkhenhtu hna caah freedom zeihmanh a um ti lo maw kan ti men lai.

Minung cu Pathian nih freedom a kan pek cio ko. Sihmahsehlaw freedom kan hman ning hna hi mah caah siseh, midang caah siseh tthatnak a chuahter tu le a si ter tu siding a herh. “Lai nawn zong poi lo, freedom ka ngei ko cu teh” kan ti a si ah cun kan palh cang. Mah ca zong ah a ttha lo i midang ca zong ah a ttha lomi a si.

Pathian sin in kan hmuh mi chawva, veel, chiattha thleidan thiamnak thluak, zangfah thiamnak lungthin kan ngeih mi hna hmang in kan thlarau caah siseh, midang thlarau hna caah siseh khamhnak a phanh pi kho tu, Pathian manager ttha si khawh i zuam cio hna u sih.