Lam Hmuhsak

“Hi ngakchia tete hna lak I pakhat hmanh hi va sualter nakin cu pa cu a hngawng ah facang rialnak lungtumpi I thlaih seh law rilipi chungah hlonh si seh law a caah a ttha deuh hnga.” (Lk 17:2)

Sualnak timi cu mah thlarau zong a hnomhter tu a si hlei ah, Pathian le minung khar lak ah siseh, minung le minung khar lak ah siseh pehtlaihnak a hrawk tu a si. Mit in hmuh nak in a cawng thiammi, a thei thiammi minung kan si caah sualnak kan tuah mi midang hna nih an hmuh a si ah cun rawhralnak, hell ram lei ah a kalpi tu kan si sual lai.

Pathian rianttuan tu hna nih Pathian rianthiang biatak tein an ttuan a si ah cun, an chim an rel ningin an nun khawh a si ah cun an thawngttha chim phuanmi hmual a ngei lai i thlarau tampi vancung ram nuam ah a kalpi kho tu an si lai.

Dawtnak nawlbia a chuah i dawtnak thawngttha bia a phuang zungzal tu, mi vialte vancung ram nuam phanhter a duh zungzal tu Jesuh Khrih nih sual palhnak a chuahter tu hna kha fakpi in a mawhchiat hna nak kha nihin bupi nih a kan thimpiak mi cathiang (Lk 17:1-6) chungah faing tein kan hmuh khawh.

Jesuh nih “Ngakchia tete” tiah a timi kan zoh tikah a sullam phun tampi in hmuh khawh a si. Thlarau lei in kan zoh a si ah cun; zumhnak ah a thazang a der mi si hna seh, Jesuh Khrih thawngtha bia a thei ka mi hna le a cohlang ka mi hna tiin kan hmuh khawh hna. Bianabia ah Jesuh Khrih cawnpiak nak thawngtha bia a cohlang ka mi lawki pakhat kha Khrihfa mi hna nih Jesuh cawnpiak ning in um loin hrokhrol nun in kan nun hnawh hna a si ah cun zeitin dah Jesuh Khrih cawnpiak nak cung ah zumhfehnak a ngeih khawh lai.
Midang kha tthat lonak lam a hmuhsak tu kan si sual maw(asiloah) tthat lonak tuah dingin a sawmtu kan si sual maw?

Khrihfa mi hna nih cun Jesuh Khrih Pathian cungah kan zumhnak hram kan bunh lawngah kan chim kan rel mi hna le kan tuahser nak hna hi thluachuah phurtu ah an cang lai i midang hna kha khamhnak lam ah a hruai kho tu kan si ko lai. Kan zumhnak kha kan nunnak ah a langh a herh. Zultu hna bangin thlacam ve hna u sih: “Maw Bawipa, kan zumhnak hi nganter deuh ko”. Amen