Nunnak ngeimi Cimitnak

Nunnak Ngeimi Hna `Tihnung Cimitnak

35.    Timhlamhnak pakhat suainak ah cu timhlamhnak ruangah a chuakkho mi kokek pawngkam khondennak kong kan ruah hnek tiah cu timhlamnak cu cungtlap vawlei `tha, dinti le thli thurhnawmnak kha zeitin zeitlukin dah a khonden khawh timi ruahchin i, cu timhlamhnak ruangah thilnung saram hna cungah a khonden khawhmi `tihnung ral kong ruahchihnak cu tlawmte lawng kan hmuhkhawh i, aakhat mi thilnung hna le aakhat mi thingkung pangpar kung hna cu biapilo bantukin rian`tuannak hna kha hmuh asi.

Lamsul lei pehtlaihnak caah khualtlawnnak lam nganpi hna cawhnak, cinthlaknak lei dum hna caah hmun kaupi hna kha haukulhnak, tiva hna ah kahcham nganpi saknak le aa lawh dengmang mi `thanchonak lei timhlamhnak suai `tuanchuahnak hna ruangah, saram hna him tein an umnak tupi hna i`thencheu in an hmannak ruangah saram hna caah umnak hmun an ngei tilonak, an i`then`theknak, saram hna hmundang pengdang ah i`thenkhawh asilonak, a long tein tlunkal khawhlonak hna a chuak. Hihna pehzulh `thathnemlonak nih saram hna an phun a lohtlaunak kong kha kan hmuh.
    Saram hna caah a himmi tupi hna kha rikhiah piak asimi bantuk a dang timhlamhnak hna tuahpiaknk zongin a cunglei i langhter mi timhlamhnak ruangah a chuak khomi `thathnemlonak hna kha a zorter khawh. Sihmanhsehlaw cubantuk hmuhchungnak chiah in rian`uannak cu ram tlawmte hna lawngah kan hmuh hna.

Atu le tu tibantukin `thanchonak caah a miakchuahter dingin saram phun cheukhat kha sikan ngei loinn an tlaih an thah hna tikah cuhna an phun lotlaunak ral in khamh i pawngkam kokek icuaithlainak lei aatluk lonak zohkhenhnak caah cu saram hna an rak hrinnak pungsan hna kha cekhlatnak hna caah lungthin bunh in ruahnak tlawmte lawng hmuh asi.

36.     Kokek pawngkam kha ralrin tein zohkhenh khamh rian`tuannak caah hmailei caan he pehtlaihin kaupi hmuhkhawh a hau. Asinain atu caante rianrang in `thathnemnak a miak hmuh dingin aa ruahchanh mi hna cu pawngkam zohkhenh kilvennak kongkau ah an lung a lut lem lailo.
    Hibantukin  mah ca `thathnemnak lawng a ruat i mizapi ca `thathnemnak a zohlo mi hna ruangah  a chuak dingmi rawhralnak man cu annih an hmuh hnga dingmi `thathnemnak amiak nakin tampi a ngandeuh. Phun aakhat mi saram cheukhat hna rawhnak, `tihnung ral an tonnak hna ruangah a chuakmi sunghnak cu aman asang ngaingai.  

 Adang minung vialte le hmailei cipeh thar hna cu kokek pawngkam rawhralnak ruangah cham dingmi anganmi chamawk kha zohloin kannih mi phukhat hmuhding mi `thathnemnak amiak pakhatte lawng kan zoh ahcun `tihnung ngai mi ningcang lonak caah kaa i phih in congoih soisel bia chimlo mi awthawnglo mithmuh tehte hna an silai.