Zumhnak in thlacam

“Na zumhnak nih an damter cang”. (Lk 18:42)

Jesuh nih mitcaw pa a damter lioah a chimmi bia a si. Mi tampi nih dai tein ko tiah an sik len ko nain mitcaw pa cu thang chinchin in a au i, “Jesuh, David Fapa, ka zaangfah tuah”(Lk 18:39) tiah a ti.

Jericho khua pawngah thil a hal lengmang mi mitcaw pa nih Pathian naih a duh tikah minung hna nih an sik. Kan pawngkam zongah thil dik thilhmaan a kawl cuahmah mi hna kha dai tein um ko tiah a timi le a soisel mi kan hmu bal cio hna maw? Pathian sin in thlop a duh mi le damnak hmuh a duh mi, Pathian hnu zulh a duh mi hna kha kan soi ve bal hna maw?

Mah mipa a pianthar ding cu ka zum lo tiah an chim zong nan theih bal cio ko lai. Micaw pa zong Jesuh he naih a duh tikah mi nih an sik. Dai tein um ko tiah an ti. Pathian he naih a duh taktak mi hna cu zeibantuk thil hmanh nih an kham kho hna lo. Mitcaw pa nih ral ttha tein Jesuh a naih ngamnak nih damnak a hmuhter hlei ah lunglawm tein Jesuh hnu zulhnak caan ttha zong a ngeihter.

Pathian he a kan hlatter tu hna hi zeidah an si? Jesuh he a kan tthenter tu hna hi zeidah an si? Ngamhsang tein Jesuh sinah kan au, Pathian sinah thla kan cam a si ah cun taksa leiin siseh, thlarau leiin siseh damnak kan hmu cio ko hna lai.